700 oo qaxootiga Dhadhaab ku nool oo daaweyn indho fiiqid ah loo sameeyey todobaadkaan

Axmed Cabdi Geelle waa 60 jir oo tan iyo 1991-dii ku noolaa xerada qaxootiga Xagar-dheer oo kamid xeryaha Dhadhaab ee gobolka waqooyi-bari Kenya waxaa uu ku faraxsan yahay in markii ugu horreysay uu wax arki muddo toban sano ah oo uu aragga la’aa kaddib. Waxaa uu aragga ku waayey wayxeello ka soo gaartay geedo indhihiisa ku dhacay xilli uu xaabo ka gurayey baadiyaha Xagar-dheer.
Wuxuu dareemayaa farxad aan la qiyaasi karin. Waxaa halkan hadda garbihiisa fadhiya mid kamid ah carruurtiisa iyo xaaskiisa, waxaa indhaha uga xiran faashadda loo xiro marka qofku uu galo qalliinka indho-fiiqista. Wuxuu saacad ka hor ka soo baxay qol indhaha loogu fiiqayey, waxaa qorshuhu yahay in daqiiqado kaddib faashadda laga furo.