Dhallinyarada ku shaqaysta bajaajta ee magaalada Baydhabo oo nolol maalmeedkooda ka raadsada waxaa saamayn ku yeeshay amar taliska booliska Baydhabo uu saddex toddobaad ka hor ku kala qeybiyay maalmaha ay shaqaynayaan bajaajta ka shaqaysa magaalada oo uu u sababeeyay in shilalka ay bateen.
Dhallinyaradan oo isugu jira kuwa deggan Baydhabo iyo kuwa barakac ku ah oo abaaraha ka yimid waxay wadaan bajaaj ay leeyihiin dad ganacsato iyadoo maalintii 100 kun laga siiyo marka ay soo shaqeeyaan.
Cabdixakiin Isxaaq Maxamed oo 18-sano jir ah wuxuu ka mid yahay dhalinyarada ku shaqeysa bajaajta, wuxuu saddexdii maalinba shaqeeyaa hal maalin taas oo lacagta uu soo helo ay qoyskiisu ka baxsadaan waxay cunaan, wuxuu sheegay in labada maalin ee uu shaqo la’aanta yahay reerkiisu ay daynsadaan wax ay cunaan oo iska bixin doonaan marka ay lacag helaan.
Bishii wuxuu lacag ahaan u heli jiray saddex milyan oo shilinka soomaaliga ah doolar ahaana u dhiganta $130 iyo bar, laakin hadda xaalka sidaas wuu ka duwanyahay, wuxuu shaqeeyaa 10 maalin bishiiba taas oo ka helo 43 Doolar, lacagtan oo ku filneyn ku mareynta nolosha qoyska iyo midda iskuulka, wuxuu Raadiyo Ergo uga waramay isbadelkan bajaajyada lagu sameyay sida isaga u saameysay.
“Waxaa igu xariiray Qoyskeenna oo lix ka kooban oo aniga u weyn, aabbe wuu dhintey, bajaajta ayaan ka biili jiray, haddda marka duleel badan ayaa igu soo furmay,inta aan shaqeyo bishii ama maalintii shaqada leeyahay reerka ayaaba ku filneyn, waa arrin aad ii taabatay meel kale saacidaad aan ka helno ma jirto,”.
Cabdixakiin oo dhigta fasalka koowaad ee dugsiga sare wuxuu sidoo kale lacagta iskuulka isaga bixiyaa $15 iyo labo wiil oo la dhalatay oo dhigta dugsiga dhexe oo midkii bishii laga qaado $8, wuxuu xusay in lacagta iskuulka ay iska bixiyeen bishaan, hase ahaate ay welwel ka qabaan in ay bixin waayaan lacagta wixii bishaan ka dambeeyan.
Cabdixakiin oo marka uu iskuulka ka yimaado galinka dambe ku shaqaysta bajaajta wuxuu sheegay inuu iska dayn doono wadisteeda marka uu iskuulka dhameeyo oo uu shaqo kale raadsan doono si uu qoyskiisa u caawiyo.
Laamaha Amniga ee magaalada Baydhabo ayaa xal u arkay in tirada Bajaajyada oo gaaraya Kun iyo Sideed Boqol oo xabbo in maalintiiba ay lix boqol shaqeyso si loo yareeyo ciriiriga gudaha Magaalada kusoo kordhay, sidoo kale meesha ay ka baxdo shilal badan oo Magaalada ka dhici jiray.
Janaral Mahad Cabdiraxmaan aadan ayaa sababeynaya sida ay ku timid in bajaajyada qeyba maalin ay shaqeysa iyadoo loo sameeyey calaamado lagu garan karo sida maalmaha shaqada u leeyihiin, taas oo loo sameyey kallaro gaar ah.
“Amni ahaan ayaa xal u aragney in sidaan loo qeybiyo, Baydhabo bishii 100 ka badan shilal ah ayaa geysaneyeen bajaajleyda, magaalada waa hal waddo oo dheer waxay ka dhigeen ciriiri, waa in badbaado loo helaa marka arimahan dhan,waxan isku afgaraney Gudiga Bajaajleyda iyo laamaha amniga in sidan ku shaqeeyan, bajaaj kale oo dheeri ahna magaalada loo ogolaan hadda kaddib”
Maxamed Cabdullaahi Nuur, muddo laba sano ah ayuu ku shaqeynayaa Bajaajta uu hadda wadaha ka yahay , lacagta boqolka kun ah oo uu ka heli jiray bajaajta wuxuu ku maareyn jiray nolosho qoyskooda oo siddeed qof ka kooban, balse hadda wuxuu ii sheegey in labada maalmood oo uusan shaqada laheyn ka qeyb qaato dhismayaasha guriyaha si nololsha reerkooda is badel uga imaan, maadama lacagta boqolka kun maalinta bajaajta Tookada leeyahay Biilka hal maalin yahay, waxaan weydiiyey sida ay u taabatay jadwalkan cusub ee bajaajleyda loo dajiyey.
“laba sano Bajaajta ayaa ku shaqeynayay aad ayaa nolosha qoyska wax uga badashey, hadda laakin markii Boqolka kun aan maalinta shaqadeyda wax ii tari waysayy ayaa dantu I bidday in aan saaxiibbo ka dhigto dhalinyaro dhismayasha ka shaqeya iyaga ayaan racayaa wixii aan kasoo heli karo 50 ilaa 60 kun oo shilinka intaas ayaa horey habeenki qoyska bariis, hilab iyo saliid wixii ii goyaon uga iibiyaa, maalintayda haddii la gaaro bajajta ayaa lasoo baxaa”
Cabdullahi wuxuu ka mid yahay dadkii abaarta kasoo barakacay, saddex sano ayuu deggan yahay magaalada Baydhabo gaar ahaana xerada ADC, wuxuu sheegay in masuuliyad ay saran tahay oo aanu meel iska fadhin Karin isagoo biil laga sugayo taas oo keentay inuu shaqo kale raadiyo
Bajaajta oo ay faa,iido ku qabaan dadweynaha magaalada iyo kuwa tuulooyinka deggan, iyagoo adeeg deg deg ah u qabsada, balse Waxaa hadda dadka tuulooyinka sameeyay amarka laamaha amniga kasoo baxay, kaddib markii Bajaajyada loo diidey inay bannaanka uga baxaan kontoroolada Magaalada baydhaabo.
Maxamed Xuseen Cali Wuxuu deggan yahay Deegaanka Ashaqow oo Baydhabo dhanka koonfur uga began 14Km, wuxuu sheegay in maalin kasta suuqa Baydhabo adeeg u imaan jiray balse hadda todobaadkii maalinta jimcaha magaalada u soo lugeeyo si uu uga soo adeegto maalintaas waxaa uu doonayo, Raadiyo Ergo ayuu uga warramay saamaynta bajaajta laga joojiyay duleedka magaalada ay ku yeelatay.
“Bajaajta kili kasta Aan u baahno waa heli jirney oo tuulada waa imaan jirtay, qof kasta suuqa dan ka leh wuu u raaci jiray, haddii qoyska qof ka xanuunsado halkan xarun caafimad ma leh Baydhabo ayaa qofki naga xanuunsan ku geysan jirnay, laakin hadda qofki Baydhabo rabo waa inuu lugeya qoraxda iyo haradka iyo daalka ayaa dad u dheer”
Dadka deegaanada degan oo kaliya ma aysan saamayn in bajaajta laga joojiyay banaanka magaalada Baydhabo ee waxaa iyaguna lacag ka heli jiray wadayaasha bajaajta oo halkii mar dadka ka qaadi jiray lacag u dhiganta tan ay maalintii oo dhan magaalada ka shaqaystaan.
