(ERGO) – Isbitaalka dhimirka Maandhaye ee magaalada Burco ee xarunta gobolka Togdheer, ayaa dawo la’aan ah tan iyo bishii Janaayo ee sannadkan, kaddib markii taageero uu ka heli jiray dad qurbo joog ah ay istaagtay. Isbitaalka waxaa hadda jiifa 15 qof oo shan ay haween yihiin. Waxaa sidoo kale ku xiriira dad kor u dhaafaya 2,000 oo dawooyin iyo talooyin ugu yimaada.
Isbitaalka ayaa markii u dambaysay taageero ka heli jiray qurbo-joog dalka Norway ku nool oo daawo iyo lacag dhan $2,000 bil walba muddo sannad iyo bar ah usoo diri jiray. Halka markii hore uu taageero ka heli jiray maamulka Somaliland, sida uu Raadiyo Ergo u sheegay Dr. Cabdi Suudi oo ah agaasimaha isbitaalka.
Wuxuu intaas ku daray in lacagta qurba-joogtu soo diraan ay ku bixin jireen adeegyada nadaafadda, biyaha, korontada iyo shaqaalaha isbitaalka oo aan ilaa bishaas qaadan mushahar, mudadaasna ku shaqaynaya si mudatacwinimo ah.
Dawo la’aanta soo food saartay isbitaalka ayaa saamayn ku yeelatay dadka aan iyagu awoodin inay suuqyada ka soo gataan, kuwaas oo u badan dadka danyarta ah iyo kuwa ka imanaya dhulka miyiga ah oo dhaqaale ahaan hooseeya.
Sahra Xasan Jaamac, waxay muddo lix sano ah gabadh ay dhashay oo 18 jir ah oo dhimirka ka xanuunsan ay dawo si bilaash ah uga qaadi jirtay isbitaalka Maandhaye. Raadiyo Ergo ayay u sheegtay in $20 oo ah qiimaha daawada halkii toddobaad ku filan, aanay awoodin inay gabadheeda suuqa uga soo gado.
Muddadii ay dawo la’aantu jirtay oo shantii bilood ee lasoo dhaafay ahayd ayay sheegtay inaanay gabadheeda wax dawo ah siin.
2015-kii ayay ka saartay isbitaalka, kaddib markii caafimaadkeedu uu soo fiicnaaaday. Guriga ayay ku haysay wixii waqtigaas ka dambeeyey iyada oo daawadana uga qaadi jirtay isbitaalka. Hadda oo isbitaalkii dawadii ka go’day ayay sheegtay in xanuunkii uu markale dib ugu soo noqonayo gabadheeda, ayna u baahan tahay daryeel caafimaad oo joogta ah.
Sahro ayaa ka xoogsata suuqa magaalada Burco oo ay ku iibiso yaanyo u saaran miis, toddobaadkiina ay ka hesho $14 oo ay ku biisho toddobo carruur ah oo ay dhashay.
Dr. Cabdi Suudi ayaa sheegay in markii dawadii ka go’ay isbitaalka, ay qaar kamid ah bukaannadii jiifay magaalada galeen, kuwaas oo uu sheegay in lagu arki karo waddooyinka iyo suuqyada magaalada, maadaama uu xanuunkii kusii kordhay, qoysaskooduna ay awoodi waayeen inay guryaha ku hayaan.
Faarax Axmed Diiriye waa 25 jir, wuxuu ka xanuunsan yahay dhimirka muddo labo sano ah. Ehelladiisa oo degan degmada Caynaba oo Burco 120km dhanka bari ka xigta, ayaa isbitaalka keentay 12 bishii hore ee May. Aabaha dhalay Faarax ayaa Ergo u sheegay in xaaladiisa caafimaad ay soo hagaagtay markii uu dawada qaatay. Iyadoo uu dhaqaalaha ku baxaya dawadiisa oo suuqa laga soo iibiyo, uu gacan ka siiyay nin ay walaalo yihiin oo magaalada Burco ganacsi ku haysta.
Agaasimaha isbitaalka Burco Dr. Cabdi Suudi ayaa sheegay in ay jiraan dad ka imaanaya dhulka miyiga ah ee gobolka Togdheer, kuwaas oo isbitaalka imanaya iyaga oo aan ogayn xaaladda ka jirta, iyaguna aanay waxba hadda u qaban karin.
