(ERGO) – Lix boqol oo caruur barakacayaal ah, da’dooduna ka yar tahay 16 jir, isuguna jira wiilal iyo gabdho ayaa ka faa’iideysta waxbarasho bilaash ah, maalmaha khamiista iyo jimcaha toddobaad walba. Caruurta oo wax ka barta lix iskuul ayaa kasoo kala jeeda qoysaska barakacay ee ku nool xeryaha kala duwan ee ku yaalla degmooyinka Kaxda, Dayniile, Hodon iyo deegaanka Lafoole ee magaalada Muqdisho.
Iskuulada ay wax ku dhigtaan caruurtan ayaa ah kuwa ka samaysan teendhooyin, jiingado iyo kuwo cooshado ah oo laga dhexdhisay xeryaha oo midkiiba ay qaado 100 caruur ah.
Dhalinyaro isugu jira kuwo dhammayeeyey ama dhigta jaamacadaha iyo dugsiyada sare ee magaalada Muqdisho, ayaa caruurtan ka caawiya waxbarashada, kuwaas oo si iskood ah isu abaabulay. Qaarkood labada maalmood ee ay fasaxa yihiin ayay waqtigooda ku bixiyaan waxbarida caruurtan. Heerarka waxbarasho ee ay ka caawiyaan ayaa ah dugsiyada hoose iyo sare.
Way adagtahay in caruurta kasoo jeeda qoysaska barakacay ay helaan fursado waxbarasho oo bilaash ah, maadaama ay ku mashquulsan yihiin helitaanka waxay cunaan. Waalidiinooda ayaan sidoo kale dhaqaale ahaan awoodin lacagaha lagu dhigto iskuullada Muqdisho oo ardaygii laga qaado $12.
Maxamed Amiin Nuur, waa 12 jir ku nool xerada barakaca ee Hibaaq oo ku taalla KM13 ee magaalada Muqdisho. Wuxuu kamid yahay caruurta fursadan helay “ horey waxba uma barin jirin, laakiinse hadda waxaan helay waxbarasho aan lacag la iga qaadin,”. Ayuu yiri Maxamed oo hortaagan fasalka koobaad ee iskuulka uu dhigto.
“Mustaqbalka waxaan doonayaa inaan noqdo bare caruurta danyarta ah ku tabaruca aqoontiisa,” ayuu raaciyay hadalkiisa.
Maxamed oo ay iskuulka la dhigtaan labo gabdhood oo ay walaalo yihiin , ayay u tahay fursadii u horreysay ee uu fasal ku fariisto. Barakaca kahor wuxuu qoyskooda oo afar qof ka kooban ku tiirsanaa beer ay ku lahaayeen degmada Waajid ee gobolka Bakool. Abaaro ka jiray deegannadaas ayaana 2016 ku khasbay qoyskiisa inay usoo barakacaan Muqdisho.
Ma jiro lebis u gaar ah oo lagu dhigto iskuulladan, sidoo kale caruurta ayaa laga caawiyaa agabka ay wax ku bartaan sida buugaagta, qalimada iyo maalmaha qaar qoysaskooda la siiyo raashin si ay ugu dhiiri geliyaan inay caruurta iskuulka usoo diraan.
Suleekho Muxiyadiin waxay kamid tahay 17-ka dhalinyaro ee ku tabarucay waxbarida caruurta barakacayaasha. Waxay sheegtay in markii ay arkeen dayaca iyo waxbarasho la’aanta caruurtan , ay isla garteen in labadaas maalin ay waqtigooda siiyaan. Bishii ayay sheegtay in ay iska qaaraamaan lacag u dhexaysa $30 ilaa $50. Lacagaha qaar ayay ka helaan jaamacadaha, iskuulada iyo qurbo-joog.
Caqabadaha ay dhalinyaradan la kulmaan, waxaa kamid ah in qaar kamid ah caruurta ay u shaqeeyaan waalidkood, taas oo yaraysa imaanshiyohooda iskuulka. Suleekho ayaa sheegtay in waqti ay ku qaadato in waalida qaarkii ay ka dhaadhiciyaan in caruurtooda ay keenaan iskuulka.
