In ka badan 800 oo qoys oo xoola-dhaqatada ah oo ka soo hayaamay deegano ka tirsan Mudug iyo Nugaal ayaa labadii toddobaad ee u dambeeyay ku qulqulaya deegaanka Godob-Yar oo 25 km dhinaca galbeedka ka jirta degmada Buurtinle ee gobolka Nugaal, halkaas oo uu roob ka da’ay tan iyo bilowgii bishaan, sida ay Raadiyo Ergo u sheegeen odoyaasha deegaankaas.
Dadka soo guurtada ah oo adeegsanaya baabuur ayaa dhulka ay ka imanayaan qaarkood waxay deegaanka ka fog yihiin ilaa 200 km, sida reer miyiga ka imanaya Jiriiban. Waxaana dadkaani ay doonayaan in ay ka faa’iidaystaan roobka gu’ga ee halkaas ka curtay.
Khubarada deegaanka ayaana sheegaya in dadka xoolo dhaqatada looga bahan yahay inay sameeyaan ka hor tag dhinaca deegaanka iyo cudurada faafa oo ka dhasha isku buuqa goobaha roobabka ka da’aan.
Weriyaheenna Cabdiraxmaan Maxamed Xaaji ayaana warbixintaan inoo soo diray.
