Xero lagu barakacay oo hoy u ahayd in ka badan kun qoys ayay ciidamada dowladda Soomaaliya dhulka la simeen 29-kii bishan. Xeradan oo lagu magacaabo Kalkaal ayaa ku taallay degmada Dayniile ee gobolka Banaadir, waxayna dadka laga raray oo deggenaa muddo toddobo bilood ah ay noo sheegeen inaan la siin muddo ku filan oo ay ku guuraan.
Qoysaskan oo u badan carruur, dumar iyo waayeel ayaa wakhtigan ku hoyanaya waddada xiriirisa Muqdisho iyo Afgooye. Qoysaskan ayaa u badan kuwo markii hore kasoo barakacay gobolka Shabeellaha hoose.
Dhulka dadkan laga saarayo waxaa la sheegay inay iibsatay ganacsato. Fursadaha maalgashi ee guryaha lagu dhisanayo ayaa ku xoogeysanaya magaalada Muqdisho. Waxaa soo badanaya ganacsatada dhulalka iibsanaya si ay hoteello iyo xarumo ganacsi uga dhigaan. Taas ayaa qiimo u sii yeeleysa xeryaha lagu barakacay oo inta badan ku yaalla meelo aan aad uga fogeyn magaalada.
Faadumo Cali Guuleed oo haysata labo gabdhood oo 9 jir iyo 7 jir kala ah, ayaa ka mid ah dadka hoygoodii ku waayay burburintaas. Waxay hadda joogaan meel bannaan ah oo u dhow KM13. Ma haysato wax ay ka dugaashato dhaxanta, cadceedda iyo amni-darrada uga iman karta cidlada. Waxay Raadiyo Ergo u sheegtay in markii ay ciidamadu u yimaadeen ay isku dayday inay ogaato sababta loo barakicinayo, laakiin ay ciidamadu xadgudub jireed u geysteen halkii ay jawaabta ka sugeysay.
Waxay hadda raashin ay cunaan ka helaan jiko si ku meel-gaar ah ay u dhiseen maamulka degmada Kaxda iyo kan gobolka Banaadir. Mana jirto caawimaad kale oo ay ka heleen dowladda iyo hay’adaha.
Waxay shan bilood kahor kasoo barkaceen degmada Qoryoolay ee gobolka Shabeellaha hoose oo dagaal-beeleed uu ka dhacay. Mana jirto rajo ay ka qabaan inay dib ugu noqdaan dhulkii ay markii hore ka yimaadeen maadaama wali xiisado colaadeed ka jirto. meeshana aanay nolol ku haysan.
Qoysaskan ayaa ku biiraya kumannaan kale oo dhamaadkii bishii hore ay ciidamo ka tirsan dowladda Soomaaliya ka burburiyeen xeryo ay ka degganaayeen KM13, degmada Kaxda.
Aamino Jaylaani waa hooyada afar carruur ah. Waxay umulan tahay muddo 10 cisho ah. Waxay qayb ka tahay qoysaska wajahaya nolosha adag ee bannaanka u hoyanaya, lagana sal-kiciyay xeradii ay degganaayeen. Raadiyo Ergo ayay u sheegtay in ciidanka dowladda oo hubaysan iyo dad la socda oo masaar wata ay khasab guryahoodii uga burburiyeen. Waxay intaas ku dartay in dadka ka madax adayga in aqalladooda la dumiyo harraanti looga saarayay.
Ma jirto dhul loo qoondeeyey qoysaskan inay degaan. Carruurtooda ayaa halis ugu jira gawaarida adeegsada wadada.
Guddoomiyaha degmada Dayniile, Cabdiweli Nuur Faarax oo Raadiyo Ergo ay la xiriirtay ayaa beeniyay warka la xiriira in dad laga barakiciyay degmadiisa. Sidoo kale afhayeenka ciidamada booliiska Soomaaliya, Cornel Qaasim Axmed Rooble ayaa xaqiijiyay in aanay ciidanka booliska howlgalkaas fulin.
