Dabka ayaa kacay goor maqrib ah waxaana uu qabsaday qeybta lagu iibiyo khudaarta ee suuqa degmada Xamarweyne oo hadda lagu tilmaamo suuqa ugu camiran magaalada Muqdisho, kadib markii suuqyo badan ay saameeyeen dagaalladii sanadihii lasoo dhaafay.
Si dhab ah looma xaqiijin sababta dabka dhalisay, laakiin daqiiqado kadib oo aan goobta gaaray ayaa xaalka wuxuu ahaa mid isku dhax-yaac uu ka muuqday oo aad l isugu jahwareersanaa.
“Cid ku jirta malahan aniga iyo Aabbaheey haddaan ka soo tagnay way gubaneysaa, war dab damis malahan miyaa meesheenna waaaye, shan dukaan ayaa noogu taallo, war biyo halasoo qabsado war dabka hala damiyo”
Ambalaasyo gaadiidka deb-demiska, gaadiid ay ganacsato wateen, dad weyne badan oo lugeynaya iyo askar rasaas cirka u rideysa ayaa goobta buux dhaafiyay mana ahayn mid uu xilligaasi fududyahay in si deg deg ah dabka loo baqtiiyo.
Dhowr ruux oo ka mid ahaa ganacsatadii ay hantidooda gubatay ama qaar ay wax xoogaa u badbaadeen, ayaan makarafoonka ladhaxqaaday.
“Xoogaa ayaan soo badbaasannay inta kale dab baa helay ma garatay walaalo, dadka tuugadaa ka daran dad badan bay hantidoda ku gubatay annagoo badan waxaan soo badbaadinnay labo tukaan.”
“Dabka gudaha suuqa ayuu ka kacay cid wax ay u fakatayna majirto wax alla waxii suuqa yaallay baaba` waaye, dabka koronto miyaa lama yaqaanno waxa uu ka kacay.”
“ Markaa aan salaad maqrib ka baxay leenka aan degganahay ma ahee leenkiisa saddexaad ayuu ka billowday dabka, koronto ayuu ka dhashay wax rajo ah malahan bis waaye.”
Guddoomiyaha degmada Xamarweyne Cabdullaahi Ibraahim Sahal Gardhuub, oo xilligaasi aan la kulmay ayaa aad uga walaacsanaa deb-demisyada soo daahay iyo xowliga dabka oo sii kordhayay “Si uusan dabkaas u fidin Waxaan codsaneynaa in cid waliba oo dab damis haysa ay nala soo gaarto, waa jiingado iyo meel cariiri ah waxa uu ku socdaa dhinaca afar irdood waxaana badbaadin u baahan misaajidka Marwaas iyo dhulka kasoo horjeeda, cid waliba oo gurmad sameyneysaa waxaa la rabaa in la dedejiyo waxaan waa jiingad, shidaal,raashiin iyo saliid, dab damiska gobolka waxaa la waayay dawaralLadoodii, AMISOM ayaana sidoo kale loo gudbiyay.”
Waxa aad moodday in xaalka uu ka soo darayay oo dabkuna uu cagta sii marinayay xarumo ganacsi oo hor leh, laakiin waxaa ku dhawaad saacad kadib goobta soo gaaray gawaari deb-demis ah oo ay askarta Midowga Afrika ee AMISON ay wateen, waxana ay markiiba sameeyeen dadaal ay ku soo koobeen xowliga dabka.
Warsame Maxamed Xasan Joodax, oo ah guddoomiye xigeenka dhinaca ammaanka ee gobalka Banaadir ayaa ayaa deminta dabka ka dib oo aan goobta kula kulmay ii sheegay inay jireen caqabado badan oo haystay deminta dabka, nasiib darrose ay dad badan ku hanti beeleen.
“Suuqa Xamar Weyne wuu gubtay, hase ahaatee wax baan ceyminnay booyadihi baa cariiri inagu noqday, dadka ay wax ka gudteen allaha samir siiyo laakiin waan dadaalnay mugdigaan goor dambe ayay booyaduhu noo yimaadeen, Waxaan ku billownay booyaddii dekadda ay lahayd dadaal badan baan qabannay AMISOM ayaana noo timid, dabna waa cadow dhib badan buu geysanayay darawallada boyadaheennana waxay rabaan in loo tababaro.”
Dabka ka kaca suuqyada Mqdisho waa kuwo isdaba jog ah oo ka hortag ama taxadar badan aan hortii la sameynin, sidoo kalana waxaa adkaata ka daba tagga ama xakameynta marka uu dabka koco taasina waxay badisaa marwaliba khasaaraha ganacsatada Soomaaliyeed kasoo gaara gubashada suuqyada walow dabkii xalay Muqdisho ka kacay uu helay gurmad ka wanaagsanaa dadbkii hore u kici jiray.
Yusuf/MH/FM
