(ERGO) – Gargaar cunto qeybin ah ayaa maanta oo Isniin ah lagu soo gabagabeeyay degmada Diinsoor ee gobolka Baay. Waxaa ka faa’ideystay 2,200 oo qoys oo ay haysatay nafaqo-darro iyo cunto-yari ka dhalatay go’doon degmadaas saarnaa tan iyo bishii July ee sanadkii hore. 21 carruur ah ayaa nafaqo-darrida ka jirta degmadaas oo Baydhabo u jirta 120 km u geeriyooday bishii Jannaayo ee sanadkan.
Qoys kasta waxaa la siiyay 75 kg oo masaggo ah, 10 kg oo digir ah, 5 liitar oo saliid ah, 7 kiilo iyo bar boorash ah iyo malmalaato 30 xabbo ah, sida uu sheegay Mukhtaar Jeelle Ibraahim oo ka tirsan mas’uuliyiinta hay’adda maxalliga ah ee Garas. “Bil kasta raashin intaas la eg ayaan qoysaska siin doonnaa saddexda bil ee soo socota,” ayuu yiri Mukhtaar.
Xabiibo Nuur Cali oo haysata 7 carruur ah waxay ka mid tahay dadka ka faa’ideystay deeqda. Waxay Raadiyo Ergo u sheegtay in ay cuntadaas maalmo quudan karaan carruurteeda oo ay gaajada tabar-darreysay, maaddaama ay maalmaha qaar qatooyo ku joogi jireen. “Biyo un baan siin jiray, marka aan wax kale u waayo,” ayay tiri Xabiibo oo leh uur lix bilood ah. Iyada iyo qoysaska kale ee la mid ah waxay codsanayaan in loo joogteeyo gargaarka, maaddaama aysan jirin hab kale oo ay raashin ku heli karaan.
Mukhtaar wuxuu tilmaamay in carruurta shanta sano ka yar, haweenka uurka leh iyo kuwa nuujinaya ay ugu badnaayeen dadka ka faa’idaystay cunto qeybinta oo socotay afar maalin. Wuxuu xusay inay hay’addooda cuntada ka heshay Hay’adda Cuntada Adduunka ee WFP. Diyaarad ayaa gargaarka lagu gaarsiiyay Diinsoor, waxayna cuntada ka soo qaadaysay Muqdisho.
“Hooyooyinka iyo carruurta waxay qarka u saarnaayeen inay macaluul u dhintaan, sidaas daraaddeed kuwa ugu sii daran ayaan soo xulnay, waxaana u qeybinnay cuntada, si gaar ah kuwo nafaqada laga helo,” ayuu yiri Mukhtaar.
Shamso Cabdi Cali oo haysata 8 carruur ah waxay Raadiyo Ergo u sheegtay inay aad ugu faraxday cuntada gargaar ah ee la siiyay. Waxay tilmaantay inay ku soo beegantay xilli ay aad ugu baahnaayeen. “Carruurteyda shan ka tirsan gaajada ayay la caatoobeen,” ayay tiri.
Dadka Diinsoor oo u badan beeraley, sanadihii la soo dhaafay ma helin roob ku filan. Keydkii cuntada ee bakhaarrada ganacsiga oo sii yaraanaya ayaa sababay sicir-barar. Kiilada sokorta ah oo Baydhabo ka joogta 16,000 oo shilin Soomaali ah waxaa Diinsoor lagu kala iibsanayaa 65,000 oo shilin.
(Muxyadiin Xusni/AT)
Content retrieved from: https://radioergo.org/old/blog?1933.
