Isbitaalka dadka dhimirka ka buka ee magaalada Berbera ee gobolka Waqooyi-Berri ayaa bilaabay ole-ole jidadka magaalada laga wadayo dadka dhimirka ka buka. Ole-olahan oo bishii labaad galay ayaa ilaa hadda waxaa lagu aruriyay bukaano ka badan kow iyo labaatan oo mid haween tahay.
Dadkan dhimirka ka buka oo ku dayacnaa waddooyinka magaalada ayaa hadda hoy, cunto, dawooyin iyo daryeel ka helaya isbitaalkan dadka dhimirka ka jiran ee degmada Berbera. Bukaanadaas oo ciidamada booliska iyo howl-wadeenno caafimaad kasoo qabteen jidadka degmada ayaa ku biiraya shan iyo labaatan bukaan oo horey ugu jiray xarunta, sida uu sheegay Cumar Sayid oo ah madaxa daweynta bukaannada ee isbitaalka.
“Ugu horreyn waxaan wax ka qabannaa nadaafadda bukaanka, wixii daaweyn u baahan waan daaweynaa, waxaana siinnaa cuntooyin nafaqo leh iyo talooyin caafimaad oo marka hore aan xaalkooda ka wareysaneyno,” ayuu yiri dhakhtar Cumar.
Ganacsatada iyo maamulka degmada Berbera ayaa xarunta ku taageeraya dhaqaalaha ku baxaya daryeelka dadka dhimirka ka buka oo horey macluul iyo daryeel la’aan ugu geeriyoon jiray waddooyinka magaalada.
Maxamuud Cabdi oo xubin ka ah guddiga ganacsatada magaalada xeebta ku taal ayaa sheegay in bil walba iyaga oo kaashanaya maamulka degmada inay xarunta siin doonaan lacag dhan shan iyo toban kun oo doolar si xaruntu awood ugu yeelato hoysiinta, quudinta iyo daryeelka dadka dhimirka ka buka.
Dhakhtar Cumar Siyad wuxuu sheegay inta dadka dhimirka ka buka oo da’doodu u dhaxeyso 25 ilaa 40 sano jir inay badidood kasoo jeedaan qoysas sabool ah oo aan awood u laheyn daryeelkooda. Waxay badidood xanuunka ka qaadeen saboolnimada baahsan oo ka dhalatay abaar xoolaha leysay oo deegaanka ka jirtay labadii sano ee lasoo dhaafay. Dhakhtarku wuxuu intaa ku daray in shaqo la’aanta ay qeyb ka tahay waxyaabaha ugu wacan in dhalinyarada deegaanku u nuglaadaan cudurada dhimirka.
Cumar Cali Xasan (Seerbiya)/FM/MR
