70 qoys oo beerlay ah oo ka soo hayaamay tuulooyin ka tirsan degmadda Bardaale ee gobolka Bay ayaa gaaray degmadda Bardaale todobaadkaan, qoysaskaan oo sanadihii ugu danbeeyey ka xumaaday dalaggii beeruhu ayaa keentay inay yimaadaan magaaladda si ay uga helaan nolol, qoysaskaan oo ka soo hayaamay tuulooyinka Toosweyne, BuuloXaawo, Aflaawe iyo Garaabay oo dhamaan ka wada tirsan degmadda Bardaale.
Gudomiyaha arrimaha bulshadda ee Bardaale Maxamed Cali Isxaaq ayaa Ergo u sheegay in todobaadkaanba ay dadku imanayeen degmadda kuwaasoo raadinaya nolol, ayna degan yihiin badidoodu xaruntii dawladda hoose ee degmadu lahayd oo ay ku yaalaan guryo ku burburay colaadihii.
Cabdi Dhaayow Aamin waxaa uu ka mid yahay beeraleyda degmada bardaale,ergo ayuu u sheegay in tacabkii beeraha xili roobadkan laga raja dhigey, qoysas badan oo nolashooda wax soo saarka beeraha ku tiirsanaa xaalad bani,adanimo lasoo daristey.
Xamdi Xasan Cali maalmo ka hor ayay gaartey Bardaale kana timid tuulada Aflaawe ayaa Ergo u sheegay inay la socdeen 8 qoys oo kale oo ay ka wada yimaadeen degaanka ayna lahaayeen beero yar yar oo ay ku beertaan roobka.
Qaar ka mid ah haweenka ayaa markii ay Bardaale gaareen waxaa ay bilaabeen iney raadiyaan shaqooyin ay ka mid yihiin dhar dhaqaal si ay nolal maalmeedka looga raadiyo carruurta ay wataan.
Sumayo Xasan Aadan “Miyiga fog ayaan ka imid, abaar iyo dhibaato kale ayaa na sameysey, xoolahaygii waxay ku dhamaadeen abaarihii hore, beer yar ayaan falan jiray, mesego ayaan ku beeray iyadiina way qalashay markay ay soo baxdayba oo roobkaa ku yaraaday deegaanka, Bardaale ayaa joognaa, waxaan sameynaa shaqooyin aan u qabto guriyaha dhar ayaa dhaqaa, dhismaha ayaa ka qeyb qataa, meeshaas ayaan ka raadinaa nolasha carruurta 7-ah aan heysto.”
Muxiyadin Xusni
