Bishii lasoo dhaafay ee November, waxaa degmada Xudur ee gobolka Bakool keliya dhiig bax ugu dhintey 10-haween ah xilliga dhalmada, iyadoo helitaanka caafimaadka ee degmada uu aad u liito, maaddaama isbitaalkii weynaa ee ay ku tiirsanaayeen degmooyinka gobolka uu ku burburay colaadihii dhacay. Sida ay Ergo u sheegtay Faadumo Samow Cali oo ka howlgasha MCHka Xudur.
Faadumo ayaa sheegtay in MCH-yo yar oo degmada ku yaalla aysan wax ka qaban karin xaaladaha lasoo gudboonaada haweenka dhalaya, sidoo kalena aysan joogin shaqaale caafimaad oo arrintaas u tababaran.
Anbiyo Axmed Maxamed oo ku nool Xudur, gabar ay walaalo ahaayeen ayaa toddobaadyo kahor ugu dhimatey dhiig bax markii ay u baahatey qaliin deg deg ah oo magaalada xudurna laga heli karin. Anbiyo oo weli xaaladdaas ka murugeysan ayaa Ergo u sheegtay.
“Walaashey caawinaad la`aan ayay u dhimatay, MCHka haddaan geynay qof qalliin ku sameeyo ayaa la waayay, diyaarad joogto loo helo malaha, haddii la helana lacag lagu raaco lama awoodo,” ayay tiri.
Maxamed Macallin oo ah guddoomiyaha degmada Xudur ee maamulka dowladda Soomaaliya ayaa Ergo u sheegay inay dhab tahay dhibaatada caafimaad ee ka taagan Xudur, balse ay maamul ahaan waxba ka qaban Karin, maaddaada gobolku ay kala go`doomiyeen colaado jira.
Guddoomiyaha ayaa ugu baaqay hay`adaha QM iyo dowladda Soomaaliya inay xil iska saaraan sidii haweenka Bakool looga haqab tiri lahaa dhanka caafimaadka oo hooyada iyo dhallaanka la badbaadin lahaa.
Muxudiin Xasan Maxamed/FM
