Xoolada dhaqatada ku nool tuulooyinka dhinaca woqooyi ee gobolka Galgaduud ayaa sheegaya in xilligan ay xooluhu la ildaranyihiin cuduro ku dhacay, kuwaas oo hoos u dhigay nacfigoodii, xilli ay jrto roob yari iyana saamaysay nololsha reer guuraaga.
Sacdiyo Macalin oo ka mid ah xoolo dhaqatada ku nool deegaanka Dhuumoodle oo dhinaca Galbeed Cadaado ka xiga 25-Km ayaa Ergo u sheegtay calaamadaha ay ku arkeen Xoolaha.
Waxayna tiri “Neefka afka ayaa nabaro ka soo baxayaan ma daaqayo, meel ayuu iska fariisanayaa sidaas ayuu ku dhimanayaa ama waa dareerayaa, mana haysano cid xoolaha noo dawaysa”.
Jirada xoolaha ka sokow reer miyiga gobolka Galgaduud qaar kood ayaa xilligan ku jira hayaan ay xoolohooda doog ugu raadinayaan, iyadoo roobkii xilliga dayrtu ku yar yahay dhinaca waqooyi ee gobolka, iyagoo u hayaamaya galbeedka.
C/llahi Xasan Cali waxa uu ka mid yahay dadka guuraya, qoyskiisa oo daganaa deegaanka Wad oo 30-KM dhinaca woqooyi ka xiga Cadaado ayuu ka soo guuray, isagoo ku jihaysan degmada Xeraale ee isla gobolka oo roob wanaagsani helay. Waxa uu ilmihii iyo aragiisii ku soo qaatay gaari looga kireeyay $400, waxan ku waraystay dusha gaariga isagoo goor barqo ah ka sii gudbaya magaalada Cadaado.
Waxa uu yiri “Meesha aan u socono xoolo lug laguma gaarsiin karo sidaas ayaan gaariga ugu soo guuray, xooluhu waa caato weyna jiranyihiin oo hadda cad mooyee caano malahan, waxaa kaloo aan ku aragnay xoolaha cuduradda sambabka iyo furuq, wuxuuna ku dhacayaa adhiga iyo geela.
Nuur Xuseen Ducaale oo ah takhtar xanaanada xoolaha ayaa isna Ergo u sheegay in gobolka galbeedkiisa ay xoolo dhaqatadii isugu tageen, dadkiina waa ka bateen, shilintii ayaa kacday, xoolo shubmaya ayaa jira, cudurka afgarfowga ayaa isna haysta, dadku cabeeb ayey u malaynayaan mase ahan, sidoo kale cudurka sababka ayaa isna meelaha qaar ka jiraan, Nuur ayaa sheega in afka neefku uu qaadayo caabuq badan oo u uusan neefku daaqi karin.
Takhtar Nuur ayaa kula taliyey dadka xoolo dhaqatadda in cudurkaani daawo leeyahay, oo ay raadiyaan takhaatiir caafimaad, sidoo kale xoolo dhaqatadda ayuu kula taliyey inay dadku talaashaan xoolaha, Reer Miyiga oo hadba u wada guura meelaha roobabka sanadkan ka da’een oo keentay in ay noqdaan dhulkaasi ciriiri ayaa ka mid ah waxyaabaha loo sababaynayo cudurada ay xooluhu isqaadsiiyeen.
Maxamuud Cabdi
