Beeralleyda magaalada Laascaanood ee gobolka Sool ayaa ka cabanaya xanuunno ku dhacaya dalagayadey beertaan, taasoo aysan aqoon waxa sababay iyo qaab loola tacaalo toona.
Beeralleyda deegaanka Waqdari oo Laascaanood dhanka koofureed kaga beegan 4km ayaa Ergo u sheegay in muddo sanado ah ay dhibaato ku qabaan xanuunno ay ka mid tahay malabisada, oo qallajisa geedaha, iyo cayayaanno ku dhalanaya.
Farxiya Ibraahim Cali oo ah hooyo haysata 6 carruur ah, kana mid ah beeralleydaas ayaa sheegtay in muddo 7 sano ah ay dhibkan qabtay, iyadoo sheegtay inay haatan iska deysay inay beerteeda ku beerto khudaarta iyo dalagyo kaleba, “Beertan ayuu dhaqaalaheenna ku tiirsanaa, oo aan nolsheenna ka soo saaran jirnay, balse in muddo ah hadda waxba lagama helo, wixii aad beertaba xanuun baa ku dhacaya, annagana beeralley aan aqoon lahayn baan iska nahay, wax fakrad ah kama heysanno sida loola tacaalo,” ayay tiri Farxiyo.
“Waan heysannaa matoorro, biyo iyo dhul beereed wanaagsan, balse xanuunnadan baan si aan yeelno garan la` nahay, waxaa jira beeralley intay dhul badan dalag ku beerteen uu ka khasaaray oo qarash badanna uu ka galay, oo haatan faraha isaga qaaday.” Ayay hadalkeeda sii raacisay.
Khadiijo Maxamuud Xasan oo muddo ka badan 20sano ahayd beeralley, ayaa haatan qorsheyneysa inay beerteeda iska iibiso, maaddaama aysan ka heleynin wax faa`iido ah, balse keliya ay uga baxdo xoog iyo shidaal.
Maxamed Cabdillaahi Ow-Xasan oo ka mid ah beeralleydaas ayaa isagana sheegay inay u baahnaan lahaayeen in khubarrada beeraha ay kala taliyaan una sheegaan halkay cilladdu ka taagan tahay, “Liin dhanaanta iyo yaanyada oo dakhli badan uu naga soo geli jiray ayaan hadda joojinnay inaan beeranno, sababtoo ah, geeduhu way qallalayaan oo miro maba dhalayaan, haddii ay cilladdu tahay dhulka lagu beeray iyo haddey miraha abuurka yihiin ma kala naqaanno” Ayuu yiri.
Cabdikariin Olol/FM
