Ilaa 11 qof oo la il daran xanuunka shuban biyoodka ayaa lasoo gaarsiiyay isbitaalka weyn ee magaalada Kismaayo labadii toddobaad ee ugu dambeyay, kuwaasoo laga kala keenay gudaha magaalada iyo deegaannada ku xeeran Kismaayo. Sida maamulka isbitaalku ay sheegeen.
Dr. Cabdisamad Abiikar oo ah agaasimaha isbitaalka ayaa Ergo u sheegay in 11ka qof ay 8 ka mid ah yihiin carruur, inkastoo aysan dhimasho jirin, ilaa 200 oo kiis oo xanuunka ah ayaa sidoo kale lasoo gaarsiiyay isbitaalka tan iyo bishii hore.
“Waqtigii kuleylaha ayaa lagu jiraa, biyaha ay dadka cabayaan oo aan nadiif ahayn ayaa dhalisay cudurka, waxaana u badan carruur dadka isbitaalka la keenayo,” Ayuu yiri Dhaqtarka.
Shaaciyo Mallow oo wiilkeeda sanad jir ah oo xanuunka uu soo ritay kula jirtay isbitaalka ayaa Ergo u sheegtay inaysan aqoon u lahayn waxa sababa shuban biyoodka, balse ay wiilkeeda ku aragtay shuban iyo matag.
Maxamed Ibraahim Yuusuf (Timo jilic) oo ah guddoomiyaha magaalada Kismaayo ayaa sheegay in maamulkoodu uu muddooyinkii ugu dambeeyayba diiradda saarayay nadaafadda magaalada, ayna dhowr meelood ka sameeyeen goobo la geeyo qashinka, oo aan magaalada dhexdeeda iyo laamiyada aan lagu daadin.
Dr. Cabdisamad ayaa dadweynaha ugu baaqay inay ku dadaalaan nadaafadda, oo ka mid ah waxyaabaha ugu badan ee xanuunkan dhaliya, “Waxaan suuqyada ku arkaa cunnooyin bannaanka lagu iibiyo oo af bannaan, kuwaasoo cayayaanku ay taataabtaan, ma habboona in la cuno cuntooyinkaasoo kale, sidoo kalena waa in waaliddiintu ay hubiyaan nadaafadda carruurtooda, sida gacmaha oo laga dhaqo markey cunto cunayaan, carruurtu difaacooda oo hooseeya way u nugul yihiin xnauunka” Ayuu yiri dhaqtarka.
Maxamed Sahal/FM
