Xoolo dhaqatada ku sugan gobollada Jubbooyinka iyo Shabeellaha Hoose ayaa ka cabanaya cudurro la sheegay in ay ku dhacayaan xoolaha oo durba uu dhimanayo neefka.
Qaar ka mid ah xoolo-dhaqatada oo markii hore abaaro iyo biyo la’aan darteed uga soo hayaamay gobolka Gedo oo miciin biday gobollada Jubooyinka iyo Shabeellaha Hoose ayaa haatan bilaabay in ay dib ugu noqdaan Gedo halka kuwa kalena ay u gudbayaan gobolka Bay gaar ahaanna geelleyda.
Cabdullaahi Diiriye oo ka mid ah dadka xoola dhaqatada reer guuraaga ah ee gobolka Gedo oo la hadlayey raadiyaha Ergo ayaa sheegay in xaaladda nololeed ee xoolo dhaqatada gobolka ee bilo ka hor u hayaamay gobollada Jubbooyinka iyo Sh.Hoose in ay taagan tahay meel halis ah, isagoo sheegayna in tiro xoolo u badan geel iyo lo` in ay u le`deen xanuunno aan la garanayn basle dadku ku magacaabaan qarax iyo baal kuwaasoo marka uu ku dhaco xooluhu ay horay ka dhamananayaan, Ma jirta wax daawo ah oo lagula tacaalo cudurradan ku laynaya xoolaha.
“Inkastoo gobolka Gedo weli ay ka taagan tahay dhibaatooyinka ka dhashay abaarta, islamarkaana xoolo dhaqatadu waxay islahaayeen deegaannadaasi waxaad ka heli kartaan biyo iyo baad, balse xaaladda noogu daran xilligan waa xanuunnadaan, waxayna xoolo dhaqatadu ay ka fakarayaan sidii ay ugu gudbi lahaayeen deegaanno kale oo ka tirsan gobolka Bay” sidaasi waxaa yiri Cabdullaahi Diiriye.
Axmed Cumur Saalixi/FO
