Kumannaan Qoys oo ku nool degmooyinka Buur-dhuubo iyo Garbahaarrey oo saameyn ay ku yeesheen xirnaashaha waddooyinka ku ximray colaadaha iyo abaaraha ayaa markii ugu horreysay muddo ka badan ilaa 8 bilood waxaa la gaarsiiyey gargaar raashineed oo ka yimid dhinaca magaalada Muqdisho, iyadoo qoys welibana la siiyey raashin ku filan muddo laba toddobaad ah.
Faadumo Aadan oo ka mid ah qoysas loo qaybiyey raashinka kuna sudag degmada Garbahaarreey ayaa Ergo u sheegtay in la siiyey raashiin isgu jiray Bur, Bariis, Sonkor, Caano, Qudaar iyo Saliid oo muddo labada toddobaad ah ku filan, waxaana laga qaybiyey Buur-dhuubo, Garbahaarreey iyo tuulooyinka hoostaga.
Gudoomiye ku xigeenka gobolka Gedo Cabdi Barre Cabdi ayaa Raadiyaha Ergo u sheegay in 13 kun oo qoys oo ku kala sugan degmooyinka Garbahaarrey, Buur-dhuubo iyo tuulooyin hoos taga loogu qabiyey raashin deeq ah oo ka yimid dhanka Dowladda.
Gargaarkan raashinka ah ayaa wax ka tarayo baahida nololeed ee dadkaasi kumannaankan qoys oo mararka qaar aan dabka shidan jirin bilihii la soo dhaafayna ay so mareen xaalad aad u adag oo cunto la’aaneed waxaan ka codsanaynaa hay’adaha gargaarka iyo dawladdaba inay na caawiyaan, sidaa waxaa Ergo u sheegay Maxamed Salaad oo ku sugan degmada Buurdhuubo.
Wuxuu intaa raaciyey, “Inkastoo gargaar kooban nala soo gaarsiiyey weli waxaa na haysta dhibaatooyinka waddooyinka ku xirmaya colaadaha, ma jiraan wax ganacsi ah oo soo gala degmada, waxaana noogu sii daran dhibaatooyinkaasi abaarta oo dadka intooda badan ay ku xoolo beeleen iyo cudurro deegaanka ka dillaacay, ayuu yiri Maxamed Salaad.
Axmed Cumar Saalixi/FO
