Saddex carruur ah ayaa lagu soo warramayaa inay harraad iyo gaajo ugu geeriyoodeen miyiga deegaanka Buq-Koosaar oo 55 KM dhinac galbeed kaga beegeen magaalada Belewayne ee xarunta gobolka Hiiraan.
Guddoomiyaha deegaanka Buq-koosaar Macallin Aadan Maxamed ayaa raadiyaha Ergo u sheegay in saddexda carruurta ah ay harraad u geeriyoodeen kadib markii uu jabay muddo ka hor ceel biyood ay dadka iyo duunyadu ka cabi jireen oo ku yaalla deegaanka taasoo keentay in biyo la’aani dhacdo.
Waxaa degaanka Buq-koosaar laga cabaa biyo ganacsi oo ay booyado ka keenaan deegaanka Ceel-dheer oo 15 km u jira Buq-koosaar, halkii fuusto waxaa la iibiyaa 350 kun oo shilin Soomaali ah mana awoodaan dadku inay gataan waayo xooluhu suuq maleh oo abaaraha ayaa saameeyey sidaa waxaa Ergo u sheegay Macallin Aadan.
Guddoomiyaha ayaa yiri “Qoysas gaaraya 35 ayaa u barakacay magaalada Beledwayne kuwaasoo ku biiray xeryaha ay ku jiraan dadka barakacay si ay u helaan nolol dhaanta midda ka jirta Buq-koosaar iyo nawaaxigeeda, carruurta geeriyootay ayaa ku sugnaa miyiga Buq-koosaar waxaana jira dad badan oo la ila daran gaajo iyo harraad waayo dadka ma haystaan cunno, biyo, adeeg caafimaad ma jiro wax gargaar ah oo ay heleen.
Macallin Aadan ayaa ka dalbaday hay’adaha samafalka inay caawimaad deg deg ah la soo gaaraan dadka ku nool deegaanka Buq-koosaar iyo nawaaxigeeda haddii kale xaaladda ayaa ka sii daraysa oo dadku gaajo iyo harraad ayay u dhimman karaan.
Maxamed Cismaan Makaraan/FO
