Go’aan ka soo baxay wasaaradda kalluumaysiga iyo khayraadka badda maamulka Puntland ayaa lagu soo saaray digreeto madaxweyne taasoo ku saabsan joojinta kalluumaysiga aar-goosatada, go’aankaan ayaa ka bilaamanaya 1da bishii Luuliyo ee ina dhaaftay ilaa laga gaarayo bisha Janaayo ee sanadka 2015-ka.
Agaasimaha wasaaradda Kalluumaysiga Puntland Cabdiwaaxid Maxamed Xirsi Joocaar oo Ergo uga waramay, wuxuu sheegay in sababta ay u joojiyeen ay tahay in la dhowro tarankeeda maadama ay riman tahay aargoosatadu bisha Sibtember ilaa janaayo.
“Qorshahayagu wuxuu yahay in wax la tashiilo oo la kobciyo dhaqaalaha soo gelaya guud ahaan dalka gaar ahaana ganacsatada iyo kalluumaysatada, waxaa Aar-goosato la dhoofin doonaa janaayo ilaa Abril sanad walba.” Ayuu yiri Joocaar.
Maxamed Salaad oo ka tirsan kaluumaysada degmada Eyl ayaase isagu go’aankaan ka muujiyey walaac.
“Dad badan ayaa ku nool Aar-goosatada wax kaleba ma haysano, waxaan ka biilnaa dadkii duufaantu baragkicisay noloshayada oo idil baa ku tiirsan.” Ayuu yiri Maxamed Salaad oo ka mid ah Kalluumaysatada degmada Eyl, wuxuu intaas ku daray in ay tani ay dhalinyarada ku dhiiri-gelin karto falal burcad-badeednimo iyo tahriib.
Agaasimaha Kalluumaysigu wuxuu isna arrintaas kaga jawaabay in qiimaha Aar-goosatada Soomaaliya uu hoos u dhacay markii la waayey dad aqoonteeda leh oo soo daba iyo suuqgeyn wanaagsan oo dunida looga sameeyo. Wuxuu intaas ku daray in aar-goosatada Soomaaliya ay tahay tii loogu jeclaa dalalka carabta, isagoona intaas raaciyey in garoomadda iyo dekedaha lagu qabanayo cidii lagu arko iyadoo dhoofinaysa aargoosato.
Abdirahmaan
