Haweenka uurka leh ee ku jira xerada barakacayaasha Kaamka Baraawe ee magaalada Kismaayo ee xarunta gobolka Jubada Hoose ayaa ka cabanaya duruufo caafimaad xumo oo haysta gaar ahaan xilliga dhalmada.
“Waxaan umuley 20 maalmood ka hor, aniga oo fooshay xilli habeen ah oo aan haysan umuliso qalabaysan, daawo iyo cid i caawisa toona, aniga oo aad u xanuusan ayaa la ii keeney goor danbe haweenay umuliso ah, balse aan wadan wax qalab ah ama daawo ah, oo iga dhalisay ma jiro gaari la igu qaado oo cisbitaalka la igu geeyo,” sidaa waxaa tiri Maryan Maxamed Ibraahim oo la hadashay raadiyow Ergo.
Ruqiyo Maxamed Axmed, waa horjoogaha Kaamka Baraawe, waxay sheegtay in xerada ay ku nool yihiin in ka badan sagaal boqol oo qoys( 900) oo isugu jira dan yar iyo barakacayaal, waxaana haysta duruufo nololeed oo aad u liita sida hoy la’aan, cunno la’aan, caafimaad xumo iyo waxbarasho la’aan ma jirto wax gargaar ah oo ay helaan ahaba yaraadee.
“Waxaan codsanaynaa in nalaga caawiyo sidii aan ku heli lahayn adeeg caafimaad oo asaasi ah iyo na loo sameeyo xarunta hooyada iyo dhallaanka si loo badbaadiyo hooyada umulayso, hadda anigu ma helo cunto igu filan waxaan dareemaa in aan ahay daciif tabar daran,waxaa jira hooyooyin badan oo uur ah oo ka welwelsan dhalmada,” Maryan ayaa tiri.
Waxaa jira qoysas aan wax hoy ah lahayn oo kal hore dab ka kacay kaamka ay kaga gubteen guryo ka samaysnaa cooshado. Waxaa sdoo kale laga dayrinayaa xaaladda dadka barakacayaasha ah ee ku sugan kaamamka kale ee magaalada Kismaayo.
Maxamed Sahal Cumar/FO
