Lix Carruur ah ayaa cudurka jadeecada ugu geeriyootay deegaannada Isgoyska iyo Mareerrey oo ka wada tirsan degmada Balcad ee gobolka Shabeellaha dhexe,waxaa la jiifa cudurkan dad gaaraya 30 qof oo isgu jira carruur iyo dad waaweyn.
Ma haysanno adeeg caafimaad oo aan kula tacaallnno carruurta marka ay jadeecadu ku dhacdo waxaan isticmaalnaa dhirta, sidaasi waxaa Ergo u sheegtay Madiino Ibraahim oo sedex carruur ah oo ay dhashay cudurkan uu ku dhacay oo mid ka mid ah u dhintay, waxayna sheegtay in carruurteeda aan horay looga tallalin xanuunkan balse hadda ay qaateen tallaalka.
Hay’adda Inter-SOS,ayaa ku dhawaad 200 oo qof ka tallaashay cudurka jadeecada tuulada Isgoyska, waxay sidoo kale gaarsiisey dawooyin lagula tacaalo jadeecada, Aamino Maxamed Cali oo ka socota Inter-SOS ayaa sheegtay in marka qofka ay ku dhacdo jadeecada haddana uu ku dhacayo shuban wata axal dhiig ah oo sii xumaneya xaaladda qofka.
Cudurka jadeecada ayaa si aad ah u saameeyey tuulada isgoyska oo 5 KM u jirta degmada Balcad, inkastoo cudurkan uu haleelay dad kale oo ku nool deegaanno kale, bishan iyo bishii hore ayaa la sheegay in deeganno kala duwan oo ka tirsan gobolka shabeellaha dhexe inay jadeeco ugu dhinteen in ka badan 20 qof.
Wali deegaannada ay ka jirto jadaacada ee gobolka Shabeellaha dhexe ma helin dawooyin iyo adeeg caafimaad oo ku filan, waxaa intaa u sii dheer abaaro saamayn ku yeeshay xoolo dhaqatada iyo beeralleeyda.
Maryam Sheekh/FO
