In ka badan 150 qoys oo ka soo barakacay dagaalladii ka dhacay gobolka Shabeellaha hoose oo gaaray magaalada Garoowe ayaa ka cabanaya duruufo nolaleed oo ku haysta xeryaha dadka barakacay.
Waxaan ka soo barakacannay deegaanka Aw-dhiigle,aniga iyo qoyskayga oo ka koobnaa ninkeyga 5 carruur ah oo aan dhalay iyo xaas kale oo u qabay seygeyga iyo 4 carruur ah oo ay dhashay,waxaa nala dhacay gaariga markaan maraynno goob u dhaxaysa Cadaado iyo Godin-labe ee gobolka Galgaduud,halkaasi waxaa ku dhintay xaaskii kale iyo cunga yar,sidaa waxaa Ergo u sheegtay Daynabo Sheekh Imaan.
Bishi May ee sanadkan ayaan imaannay xerada Jawle ee dadka barakacay ee magaalada Garoowe,ma haysanno hoyi,cunto,caafimaad,waxbarasho,shaqo marka laga reebo in aan qashinka ka qaado xaafadaha oo maalmaha qaar aan soo noqdo anoo fara maran
Dhaqaalaha aan ka helo qashin qaadista maalintii waa 70 kun oo shin Soomaali ah oo dhiganta 3 dollar,guriga aan degganahay waa 2 qol oo jiingado ah kiradu waa 400 oo kun oo shin Soomaali ah oo dhiganta 20 dollar,maalintii hal mar ayaan wax karsanaa mararka qaarna ma helnno.
Cismaan Abuukar oo ah horjoogaha kaamka Jawle,ayaa Ergo u sheegay inay diiwaan galiyeen 80 qoys oo barakacayaal cusub ah oo ku dul nool kuwa kale.waxaa aad u liidata xaaladda iyo duruufaha ay ku nool yihiin dadkan ma jirtyo wax cawimaad ah oo ay ka heleen maamulka iyo hay’daha samafalka barakacayaashan cusub.
Cabdiraxman Maxamed/FO
