Boqolaal qoysas xoolo-dhaqato ah oo haraad ba’an ku heysto tuulooyinka ku xeeran degmooyinka Ceelwaaq iyo Baardheere ayaa helaya biyo lacag la’aan ah oo deegaanada ceelasha leh laga soo dhaamiyay.
Weriyaha Ergo ee Baardheere ayaa soo sheegaya in biyo u dhaaminta dadka reer guuraa ah ee ku nool tuulooyin toban ka badan oo labada degmo u dhaxeeya uu bilaabay urur dhalinyaro oo la yiraahdo Saado. Ururka oo gobolka Gedo ka howl-gala ayaa maalin walba toban booyadood oo biya wada u dira tuulooyinka haraadku ka jiro.
Raadiyoow Ergo ayaa haraadka deegaanadaa ka jira markii ugu horeysay sheegtay bishii hore kadib markii weriye Axmed Cumar Saalixi uu ku safray deegaanadaa. Ceelasha biyaha ayaa guray, barkadahuna waa wey qalaleen sida uu sheegey weriyaheena.
Laakiin Aar Maxamed Maxamuud oo ah gudoomiyaha tuulada la yiraahdo Geriley ayaa raadiyo Ergo u sheegay in dadku hadda ay kasoo raadka haraadku ku reebay maadaama ay maalin walba biyo loo soo dhaamiyo.
