Takhaatiirta dhinaca caafimaadka ee gobolka Sanaag ayaa sheegaya in 14 qof oo carruur u badan uu cudurka shubank ku dilay degaannada Celbuh iyo Xingalool oo ka tirsan gobolka Sanaag.
Dr. Cabdi Maxamuud Muuse oo ka mid ah hawl-wadeenada caafimadka ee Ceelbuh ayaa Ergo u sheegay in shubanku bilowday badhtamaha bishii Diseembar ka dib roobabkii dayrta, bishii la soo dhaafayna uu jiray, ilaa haddana ay dhinteen 14 qof.
Dr. Cabdi ayaa sheegay in ilaa hadda cudurku haleelay 300 oo qof guud ahaan gobolka, daawada deeganka taalna ay yar tahay tanoo keenaysa in cudurku weli ku sii faafayo deeganka.
Dr. Axmed Ashwaare oo isna ah takhaatiirta caafimaadka ee Xingalool ayaa sheegay in 80 qof in ka badan ay weli u jiifaan shubanka, ilaa hadana 7 qofna ay u dhinteen,
Farxiya Faarax Ciise oo ah hooyo ku nool Ceelbuh ayaa Ergo u sheegtay in ilmo ay dhashay oo jira 20 maalmood uu kaga dhacay shuban biyood, ilaa 7 maalmood ayuu hayey cudurku kadibna wuu u dhintay, carruurta magalada iyo kuwa miyigaba cudurku waa ku jira, inta kale carruurtayda kale hadda waa ka ladan yihiin.
Guddomiyaha gobolka Sanaag ee Puntland Maxamuud Ismaaciil Jaamac Ciyoon ayaa sheegay in xarrumaha caafimaad oo aad ugu liita deegaanka ay qayb ka tahay shubanka, ayse hadda hawl geliyeen xarumo caafimaad oo ku yaal Badhan iyo Ceelbuh, waxaana war gelinay wasaaradda caafimaadka, haddana kooxo dhakhaatiir ah ayaan u dirnay goobaha shubanku ka jiro kuwaasoo wada dheecaanada fuuq baxa, waxaase loo bayahan yahay gacan intaas ka weyn si loo caawiyo dadka dhibaataysan.
Cabdi Maxamed Muuse oo isna ka mid ah hawl wadeenada caafimaadka ee Ceelbuh ayaa Ergo u sheegay in dhibaatada jirtaa tahay iyadoon dadka aan lala gaari karin wacyi gelin, iyadoo cudurka hadda ka jiro dhulka miyiga ah ee ka baxsan magaalooyinka.
Guddoomiyaha gobolka Bari Maxamuud Ismaaciil ayaa ka codsaday hay’adaha gargaarka gurmad caafimaad, dadkana ugu baaqay inay iska kaashadaan hagaajinta saxadda iyo faya qabka dadka.
Amina/MH/MRS
