Baahi dhanka caafimaadka ah ayaa ka jirta deegaanka Godonlabe ee gobolka Galgaduud, kadib markii uu gubtay isbitaalkii deegaankaas.
Isbitaalkii Godoinlabe oo ahaa isbitaalka keliya ee deegaankaas uu lahaa ayaa sanadkii 2012kii waxaa hirgeliyay qurba joogta deegaanka u dhalatay oo kaashanaya dadka deegaanka, bishan 3deedii ayuuna ku gubtay dab ka dhashay talaajad gaas, dabkaasoo gebi ahaanba baabi`iyay qeybihii isbitaalka.
Cusmaan Diiriye Faarax oo ah agaasimaha isbitaalkii gubtay ee Godinlabe ayaa sheegay inay si maalinle ah u qaabili jireen bukaanno gaaraya 40 qof, balse hadda bukaannadu ay adeegyada caafimaadka u doontaan degmada Cadaado oo 30km u jirta.
“Deegaankan waxaa hadda ka jira baahi caafimaad oo daran xitaa tuulooyin gaaraya 20 oo deegaanka ku xeeran ayaa adeeg caafimaad usoo doonan jiray, waxaa dhowaan dillaacay cudurka jadeecada kaasoo kusii baahaya deegaanka, sababtoo ah malaha meel lagu daweeyo carruurta uu soo rito cudurka.” Ayuu yiri Cusmaan Diiriye. “Waxaa ugu daran haweenka uurka leh, ilaa 9 haween ah ayaa isbitaalka ku umuli jiray maalin walba.” Ayuu hadalkiisa sii raaciyay.
Waxaa jira bukaanno qaar aan awoodin inay adeegyada caafimaadka u doontaan degmada Cadaado, Maxamuud Warsame Wehliye oo ah wiil dhalinyaro ah kana mid ah bukaannada soo aaday Isbitaalka Cadaado ayaa Ergo u sheegay in isaga iyo dad kale oo badan ay adeeg caafimaad soo doonteen, balse uu arkay dad deegaanka isaga xanuunsan oo aan awoodin inay Cadaado aadaan. “Waxaa qasab igu noqotay inaan halkan Cadaado imaado, laakiin dad waayeel ah, haween iyo carruur baa jira aan soo aadi karin, aad buu muhiim inoogu ahaa isbitaalkeenna.” Ayuu yiri Maxamuud.
Guddoomiyaha degmada Godinlabe Cabdiyare Macallin Qase ayaa sheegay in saamayn ballaaran ay yeelatay gubashada isbitalka Godinlabe, isagoo ka codsaday bulshada Soomaaliyeed iyo hay’adaha samafalkaba inay ka caawiyaan dib u soo celinta adeegii caafimaad ee Godinlabe. “Wuxuu ahaa isbitaal ay ku xirnaayeen deegaanno badan, dadkoo idil ma wada tegi karaan Cadaado, waxaa jira dad badan oo aan awoodin, xaaladaha degdegga ah sida dhalmada haweenka looma qaadi karo halkaas.” Ayuu yiri guddoomiyaha.
Isbitalka Godinlabe oo ay hirgaliyeen dadka deegaanka oo qurbajoogta kaashanaya sanadkii 2012-kii ayaa bixin jiray adeeg caafimaad oo lacag la’aan ah, waxaana taageeri jiray NGOyada arrimaha caafimaadka ee gobolka Galgaduud ka howl gala.
Maxamuud Cabdi Diirshe/FM/AM
