Barakacayaasha ku nool xeryaha Jowle oo 2km dhanka bari ka xiga magaalada Garowe ee xarunta maamul goboleedka Puntlad ayaa ka cabanaya kiro sharci darro ah oo laga qaado guryaha ay deggan yihiin ee ka sameysan jiingadaha iyo cooshadaha.
Xeryaha Jowle waa xeryo ku meel gaar ah, waxay ka kooban yihiin 13 kaam oo waaweyn, waxaana deggan 1800 oo qoys, badankoodna ka yimid gobollada koofureed ee dalka, ayna soo salkiciyeen abaarihii dalka ku dhuftay, dadkan oo markii hore degganaa xeryo ku yaalla gudaha Garowe waxaa xeryahan usoo rartay dowladda hoose ee Puntland, waxayna dhulkaas muddo 10sano ah kala wareegtay dadkii dhulkaas lahaa.
Barakacayaashan ayaa sheegay in 4tii bilood ee ugu dmabeysay laga qaadayay bishii lacag dhan 125,000 Sh. So qoyskiiba, sida Ergo u sheegay guddoomiyaha xerada Banaadir, Saleebaan Maxamed.
“Dowladda ayaa halkaan ina soo dejisay, waxayna inoo sheegtay in 10sano aan lacag la`aan ku degganaanno, dad sheeganaya inay dhulka leeyihiin ayaa kiro naga qaada, haddaan diidnana nagu hanjabay inaan isaga guurno, waxaan nahay barakacayaal mana awoodno lacagtaas.” Ayuu yiri guddoomiyuhu.
Aqbal Maxamed oo ka mid ah barakacayaasha halkaas deggan ayaa sheegtay inay u soo xamaal tagaan Garowe, maaddaama ay ka fogtahayna ay gawaarida bulshada u soo raacaan taasoo ay lacag uga baxdo, sidaa darteed lacagaha ay xamaalka kasoo helaan aysan ka go`eynin kiro ay bixiyaan.
“Guryo badan oo la fiiqay ayaa jira oo dadkii laga saaray, halkan waxaa deggan dad maato ah oo ka xamaasha magaalada, waxaan raacnaa baabuur lacag badan naga qaato sii socod iyo soo noqod intaba, waa arin caqabad ah kamana bixi karno in kiro haatan aan ka bixino dhulkan aad u jeeddaan ee magaalada ka fog” Sidaa waxaa yiri Cisman Abukar oo barakacayaashaas ka mid ah.
Gudoomiyaha Gobolka Nugaal Cabdi Xirsi Cali oo booqasho ku tegay xeryahaas ayaa sheegay inay dembi tahay in kiro laga qaado barakacayaasha masaakiinta ah ee dowladda hoose ay halkaas dejisay, “Arrintaas waa barakicin, qofkii lagu arkana sharciga ayaan la tiigsaneynaa.” Ayuu yiri guddoomiyuhu.
Sanadkii 2011kii, dowladda hoose ee Puntland ayaa barakacayaal gaaraya 2,400 oo qoys kasoo rartay xeryaha Shabeelle, Siligga iyo kaam Ajuuraan oo ku yaallay daafaha magaalada Garowe, waxayna dejisay xeryaha Jowle oo ka fog magaalada, si loo ilaaliyo nadaafadda, sida uu Ergo u xaqiijiyay xoghayaha guud ee kaamamka Jowle, Suudaani Axmed Cali.
Cabdiraxmaan Xaaji/FM/AM
