(ERGO) – Yuusuf Muuse Wacays wuxuu billaabay inuu dib u diyaarsado beertiisa oo abuur ay ugu dambeysay bishii Oktoobar ee sanadkii 2017-kii, xilligaas oo uu ku soo fatahay dooxa Biyo-Macaan. Fatahaadda waxay ka dumisay ceelkii uu beertiisa ku waraabin jiray, sidoo kalena waxay ka qaadday matoor beerta u saarnaa iyo lixdan geed oo bambeelmada iyo saytuun isugu jiray. Meelihii ay fatahaadda ka soo gali jirtay beertiisa ayaa looga ooday darbi dhiirirkiisu yahay labo mitir, ballaciisuna yahay hal mitir.
“Waan ka tagay markii hore beerta oo ceelkii ayuu iga aasay. Dhirtii midhaha laga manaafacaadsanayay qayb dhan ayuu qaaday, dhibaato wayn ayuu ku sameeyay marka hore. Iminka difaac wanaagsan ayaa laga helay,” ayuu yiri.
Yuusuf wuxuu hadda ka gurayaa beertiisa qashinkii ay fatahaaddii ugu dambeysay ku reebtay, wuxuuna ku rajo weyn yahay inuu beerta dib u abuurto bisha Febraayo ee sanadkan, marka ay iskaashatada beeraleyda dhameeyaan dib u qodista ceelkiisa.
Afartii sano ee la soo dhaafay, qoyskiisa oo ka kooban lix qof ayaa ku tiirsanaa $200 oo ay u soo dirto walaashiisa oo ku nool dalka Jabuuti. Wuxuu hadda ku rajo weyn yahay inuu ka kaaftoomo lacagtaas, marka uu beertiisa abuurto oo ay u soo go’do.
Cabduqaadir Maxamuud Axmed, guddoomiyaha iskaashatada Xamdi oo ay ku mideysan yihiin beeraleydan ayaa Raadiyow Ergo u sheegay in ololahan ay uga xiri doonaan fatahaadda dooxa in ka badan 400 oo beer. Beerahan ayaa ku kala yaalla tuulooyinka Biyo-Macaan, Gogol-Wanaag iyo Huluq oo 35 km galbeedka uga beegan Hargaysa.
Guddoomiyaha ayaa xusay in howshan ay soo gaba-gabeynayaan inta aan la gaadhin bisha Abriil oo la filayo inuu curto roobka gu’ga.
“Dhibaatada ugu wayn waxay ahayd waqtiyada roobka marka uu daadku fataho wuxuu qaadayaa mashiinkii, iyo wadnihii beerta oo ceelkii ah. Ceelashii xagga dooxa ayay xigaan inta badan, marka uu aasmo waxay beertii noqonaysaa mid aasantay oo ma shaqeynayso, taas ayaa keentay in dadka ay ka tagaan beerahooda,” ayuu yiri.
Cabduqaadir ayaa sheegay inay dib u soo laabanayaan labaatan beeraley ah oo isaga tagay tacabka markii uu daadku baabi’iyay ceelkii iyo dalagyadii u beernaa.
Khadar Nuux Batuun oo ah beeraley ku nool tuulada Huluuq ayaa sheegay in beertiisa uu daadku dhowr jeer ka baabi’iyay dhirtii ku beernayd oo ahayd saytuun iyo liin-macaan. Wuxuu sheegay in daadkii u dambeeyay ee dooxa oo dhacay 2021-kii uu ka qaaday dalagyada. Sidoo kale saddex sano oo isku xigta ayuu ceelka ka dumay markii dooxu ku fatahay.
Khadar oo ah aabbaha sagaal carruur ah ayaa sheegay in beertiisa oo 12 hektar ah hadda loogu sameeyay darbi meelihii ay fatahaaddu ka soo gali jirtay.
Beeraleyda iskaashanaya ayaa meelihii ay fatahaaddu ka soo gali jirtay ku ooday dhagxaan silig lagu guray, kaas oo ay dayr uga dhigeen dhinacyada dooxa xiga.
