(ERGO) – Cabdirashiid Siciid Xasan oo ku nool deegaan xeebeedka Garmaal oo ka tirsan Dangorayo waxaa ku cayroobay daadadka rooabab lixaad leh oo ka da’ay Puntland. Cabdirashiid 500 oo neef oo adhi ah ayaa labo habeen ka hor ay daadadku ka qaadeen. Qoyska oo ka kooban isaga, hooyada iyo 7 carruur ah ayuuse la baxsaday. Wuxuu sheegay in uu deggenaa tog dhicaniis hase yeeshee aanu filanayn in sidan ay wax noqonayaan.
“Goor anan gam’in ayaan maqlay jigta biyaha iyo qeylada adhiga, markaas biyaha laba talaabo ayey ii njireen, waxaa ila hurday 7 ciyaala iyo hooyadood, gaabdh yar ayaan la cararay, haddana lex jeclaa i gashay wiil ayaan saaray, misna gabadh ayaan saraay, sidaas ayaan dadkii ku badbaadshay, wax adhi ahna haba yaraatee ma arag,” ayuu yiri Cabdirashiid oo hadda qoyskiisa ay la nool yihiin qoysas kale oo ka agdhawaa oo iyagu daadka ka badbaaday.
Beeraleyda ayaa sidoo kale ay saameeyeen roobabku. Khadadka taleefannada oo adag weli rasmi looma ogaan tirada beeraha ku waxyeelloobay buuraleyda Calmadow ee gobolka Sanaag oo ka mid ah meelaha ugu beeraha badan Puntland, hase yeeshee iskaashatada deegaanka Durduri oo ka tirsan degmada Laasqoray ayaa Raadiyo Ergo u sheegay in iyaga 14 beerood iyo 10 ceel biyood uu waxyeelleeyay roobku.
Warsame Maxamed Yuusuf, labo beerood oo middii hal higtar ahayd, ayna ku beernaayeen khudaarta cagaaran iyo timir ayuu ku lahaa deegaanka Durduri. Warsame oo qoyskiisa ka kooban yahay 7 qof, beeraha ayay ku tiirsanaayeen waxayna hadda wajahayaan wax-la’aan.
“Aniga beerahayga wixii ku beernaa oo cagaar ahaa iyo wixii beernaaba kuma hadhin geed aan ku dhaho kaas ayaa ku hadhay,” ayuu yiri Warsame.
Dhanka kale cutubyo ka tirsan ciidamada Daraawiishta Puntland ayaa xalay fiidkii gurmad u fidiyay labo boqol oo geel ah oo ku limiday deegaanka Libaaxe oo ka tirsan degmada Garoowe oo ka mid ah meelaha uu roobka ugu badan ka da’ay Puntland.
Daadadka ka soo rogmaday roobabkan oo saacado badan da’ayay ayaa sababay dhimashada hal qof oo la socday mid ka mid ah labo doonyood oo kalluumeysi oo ku degey degmada Bareeda, 91 guri oo dumay, 250 beer oo biyaha raacay, 11 qoys oo xoolo beelay iyo jidad go’ay guud ahaan gobllada Nugaal, Bari iyo Sanaag sida uu faahfaahinayouu Ergo u sheegay, agaasimaha Maareynta Musiibooyinka ee wasaraadda arrimaha gudaha Puntland Cawil Maxamed Xirsi.
