Barakacayaal hor leh oo gaaraya ilaa 150 qoys oo kasoo qaxay degmada Tiyeeglow ee gobolka Bakool, una badan haween iyo carruur oo bil kahor ay dagaallo ku dhex mareen ciidamada dowladda iyo Al-shabaab ayaa soo gaaray magaalada Baydhabo.
Barakacayaashan oo xero cusub ka sameystay duleedka magaalada Baydhabo, ayaa sheegay in ammaan darrada ka jirta deegaankooda ay ku kalliftay inay guryahooda, xoolahooda iyo beerahooda ay kasoo tagaan.
Xabiibo Maxamed Aadan oo 40jir ah, isla markaana haysata 6 carruur ah ayaa Ergo u sheegtay in carruurta ay iyada Aabbe iyo Hooyo u tahay, deegaankii ay joogtay oo ay uga shaqeynsan jirtayna ay kasoo barakiciyeen dagaallo iyo abaaro. “Carruurtan nolosheeda wax aan ku maarreeyo malaha, roobab baa halkan nagu helay, guryo aan gabbaadsannana ma laha, halkan 24kii saac ee ugu dambeeyay wax dab ah lagama shidin ayay tiri.” Xabiibo.
Cadey Cabdi Xasan oo 60jir ah, waxay haysataa 7carruur ah, oo iyada ka sugaya wax ay cunaan. Weriyaha Ergo ee gobollada Bay iyo Bakool oo gurigeeda ka sameysan bacaha iyo maryaha la isku kakabay ku booqday ayaa soo arkay carruurteeda qaarkood oo baahi la oynaya, iyagoo aanan maalintaasi loo heynin wax ay cunaan.
Cadeey ayaa Ergo u sheegtay “Baahi, oon, abaar iyo dagaallo ayaa naga soo qaxiyay deegaankeenna, halkaanna waxba uguma imaanin, roobabkaan da`aaya meel aan uga hagooganno malaha, waxaan codsaneynaa in nala soo gargaaro.” Ayay tiri Cadeey.
Xaawo Isxaaq Cabdi oo ah horjoogaha kaamkan, ayaa sheegtay in barakacayaashan ay ka fog yihiin magaalada, haddii ay shaqooyin yaryar u raadsan lahaayeen, isla markaana wax ka warqaba aysan jirin.
“Waxaa noogu daran cunto iyo hoy, sababtaan inta u nimid waa nabadda darteed oo dagaallo ayaan kasoo barakacnay, waxaan is lahayn halkan aad ku heshaan wax idiin gargaara.” Ayay tiri Xaawo.
Xuseen Cali Sheekh oo isna ka mid ah barakacayaashan kana soo barakacay tuulada BIyooley ee degmada Tiyeeglow hoos timaadda ayaa sheegay in dadka soo barakacay ay u badan yihiin haween iyo carruur oo ragga badankood aysan awoodin inay reerahooda soo raacaan dhanka ammaanka dartiis, ayna u qaxeen meelo kale.
Muxyadiin Xasan Maxamed/FM
