Qaar ka mid ah ciidamada, maxaabiista iyo qaybo ka mid ah bulshada ee maamulka Puntland ayaa markii ugu horraysay ka faa’iidaysanaya tababarro lagu fahansiinayo macnaha cudurka AIDIS-ka iyo waxyeelladiisa.
Waxaana ka qaybgalaya in ka badan 500 oo askari oo ka socoda qaybaha kala duwan ee ciidamada,waxaana lagu barayaa khatarta cudurkan uu leeyahay sida lagu kala qaado iyo in qofka qabaahi uu bulshada ku dhex noolaan karo, waxaana ka faa’iidaysanaya tababarkan ciidamo kala jooga degmooyinka kala ah, Galdogob, Buur-saalax, Garoowe, Buurtinle, Bender Bayla iyo Qandala.
“Barnaamijkan waxaan u qabannay dhammaan dadka u nugul cudurradan ee da’doodu ka wayn tahay 25 sano, waxa ugu badan waa askarta iyo maxaabiista, waxaa kaloo ku jira dadka qaadka cuna iyo kuwa iibiya, gabdhaha Shaaha kariya, wadaaddo iyo duubabka dhaqanka. Waxaa kaloo jira dad la aruurshay oo ah kuwa jirkooda ka ganacsada iyo qaybo kale.” Ayey tiri Maymuun Salaad oo hay’adda maxalliga KAALO u qaabilsan AIDIS-ka oo fulinaysa barnaamijkan.
Waxay intaa ku dartay in maxaabiista ku jirta xabsiyo ku yaalla magaalooyinka Boosaaso iyo Garoowe ay u qabteen tababarro wacyi galin ah oo ku aaddan cudurkan, qiimayn ay sameeyeen UNICEF iyo hay’adda AIDS-ka Puntland ee PAC ayaa lagu ogaaday in ay jiraan dumar jirkooda ka ganacsada oo gudaha jooga una shaqaysta hab qarsoodi ah, kuwaasna tababarro ayaan u samaynaa iyagoo la qarinayo.” Ayey tiri.
Barnaamijkan wacyi galinta ah ayaa dhaqaalaha ku baxaya waxaa bixinaysa Hay’adda UNICEF, waxaana fulinaya ururka waddaniga ah ee KAALO, kaasoo ay ka faa’iidaysanayaan 1700 qof oo isgu jira qaybaha kala duwan ee bulshada iyo ciidamada.
Cabdiraxman Maxamed Xaaji/FO
