Dufcaddii ugu horreysay oo barata cilmiga xanaanada xoolaha ayaa ka qalin-jibiyey kuliyadda Barashada Cilmiga Xanaanada Xoolaha ee Jaamacadda Horseed. Saddex iyo labaatan wiil iyo toddobo gabdhood oo dhammeystay afar sano oo ay baranayeen culuumtaas ayaa shahaahada koowaad ee jaamacadda lagu guddoonsiiyey magaalada Muqdisho 25-kii bishii hore.
“Waa markii ugu horreysay muddo 23 sano ah ardey ka qalinjabiso cilmiga xanaanada xoolaha uga qalinjabiso dalka gudihiisa,” sidaas waxaa tiri maamule ku xigeenka kuliyadda Dr Maxamed Xasan Buubi. Wuxuu intaa ku daray in dhakhaatiirta xoolaha ee cusub ay wax weyn ka baddali doonaan hannaanka caafimaadka ee xoolaha oo ah isha ugu weyn ee dhaqaale uu kasoo galo dalka.
Waxaa Soomaaliya oo dadka badigood ay xoolalley yihiin ka jira baahi weyn oo loo qabo dhakhaatiira xoolaha, taas oo dhalinyarada qalinjabisay ku caawineysa in si deg deg ah shaqooyin u helaan.
Axmed Xasan oo ka mid ah dhakhaatiirta cusub ee caafimaadka xoolaha ayaa ballan-qaaday in ay wax weyn ka qaban doonaan fayo-dhowrka xoolaha Soomaalida.
“Baahi weyn baa loo qabaa dhakhaatiir cilmiga xoolaha baratay oo miyi iyo magaalaba tagi kara. Waxaan diyaar u nahay in aan baahidaas buuxinno,” ayuu yiri Axmed oo hadlay weriye Ergo ka tirsan. Kuliyadda Cilmiga Xanaanada Xoolaha ayaa la aas-aasey sanadkii 2005.
