Laba kun iyo saddex boqol oo qoys ayaa guriyahoodii ka cararay kaddib markii webiga Shabeelle uu ku soo fatahay degaanno ka tirsan degmada Afgooye ee gobolka Shabeellaha hoose, sida ay sheegtay Wasaaradda Gargaarka iyo Maaraynta Masiibooyinka ee dawlad-goboleedka Koonfur Galbeed
Cabdinaasir Caruush oo ah Wasiirka Maaraynta iyo Masiibooyinka ayaa sheegay in sidoo kale ay saamayn ku yeelatay fatahaaddu in ka badan lix kun oo qoys, isagoo intaas ku daray in dadku u baahan yihiin gargaar deg-deg ah sida cunto, hoy iyo biyo nadiiif ah.
Sahro Cumar Maxamed oo qoyskeedu ka kooban yahay 14 ruux, ayaa muddo laba toddobaad ah dulsaar ku ah qoys kale oo ay daris yihiin oo ayan biyuhu gaarin gurigooda. Guriga Sahro oo jiingad ah ayaa waxaa galay biyo aad u badan oo wali dhex fadhiya. Waxay nolosha Sahro iyo qoyskeeduba ku tiirsanaayeen wiil ay dhashay oo khudaarta ku daabbula gaari-dameer kuna geeya suuqa.
“Afar saac barqadii ayay biyo na soo galeen carruurta ayaan kala baxnay, alaabti iyo gurigi wali way is dhexyaallaan, wax laga qabto ma leh, Sinta ayay qofka u joogaan biyaha, way badan yihiin, wayna sii socdaan.”
Sahro oo deggan xaafadda Damalley degmada Afgooye oo ka mid ah xaafadaha saaran webiga, ayaa tilmaantay in marki hore ay biyahu tartiib u soo galeen xaafadda islamarkaana ay billowday in carruurta ay gayso meel kale.
“Biyaha bahallo ayaa la socda sida maska, jabisada iyo kuwa kale taasi ayaaba cabsi kale ah, inta aan ogahay laba cunug bay qaniineen mid wuu dhintay, midna waa sakaraad, roobka waa da’yaa, biyaha webiga way socdaan,”ayay tiri Sahro oo aad uga walwalsan khataraha kale oo biyuhu la socdaan.
Waxay fatahaaddu wada gaartay xaafadaha kala ah Dhagaxtuur, Damalley, Ceel-qode, Aytire iyo qaar ka mid ah tuulooyinka Sabiid, Raqayle iyo Caanoole oo dhammaantood hoos taga degmada Afgooye sida uu radio Ergo u sheegay gudoomiyaha arrimaha bulshada ee degmada Afgooye Cabdullaahi Xasan Cabdi, wuxuuna intaa ku daray in fatahaad tan la mid ah aysan ka dhicin Afgooye inta uu isagu garanayo.
“Dhammaan webiga biyahu waa ka sara-mareen, waa ka awood badiyeen, meel uu webiga ka jabay waa la difaaci karaa, jawaano carro iyo wax baa la dhigi karaa, hadda awooddu saas maahan, awood sa`id ayuu la yimid webiga.’’ Ayuu yiri Gudomiye Toogane.
Khadiijo Xuseen oo ka soo barakacday tuulada Caanoole ayaa iminka ku sugan tuulada Sabiid oo Caanoole kaabiga ku haysa. Khadiijo ayaa sheegtay in guud ahaan dadki degganaa Caanole ay ka barakaceen oo guryihii iyo beerihiiba ay biyo galeen, iyadoo intaa ku dartay in roobka iyo daadku wada-socdaan oo aysan wali istaagin.
“Shaqo ma leh, raashin ma leh, cunto ma leh, guri la dego ma leh, hal qol ayaa dad badan lagu degaa, xataa guri ijaar ma leh illeen wixii dhan biyo ayaa galay,”ayay khadiijo tiri.
Guddoomiyaha tuulooyinka Sabiid, Caanoole, Moordiinle iyo Belad Amin Maxamed Abuukar Axmed ayaa sheegay in khasaaraha ugu badan uu gaaray beeraha, sidaas si la mid ahna ay dadka deegannadaas ku adag tahay in ay isu gudbaan ama ay ka soo iibsadaan magaalada Afgooye oo u jirta 12 km waxyaabaha daruuriga ah ee ay u baahan yihiin.
“Khasaaro aan la soo koobi karin ayay biyaha webiga gaysteen, xag guryo iyo xag beeraba, meel afka la aaddiyaa la la`yahay, dadkii oo dhan hal meel ayey joogaan. Sabiid iyo Caanoole oo kale waa kala go`an yihiin”ayuu yiri guddoomiyuhu.
