Magaalada Dhahar ee gobolka Sanaag waxaa laga daah-furay mashruuc ballaaran oo caafimaad, kaasoo lagu magacaabo Mashruuca Daryeelka Caafimaadka Asaasiga ah.
Waxa uu ka kooban yahay shan MCH, shan xarumood oo kuwa caafimaadka ah iyo labo goobood oo nafaqeyn ah. Waxaa dhammaan xarumahan laga hirgelinayaa deegaannada magaalooyinka Dhahar iyo Badhan ee gobolka.
Fulinta mashruuca oo ay iska kaashanayaan wasaaradda caafimaadka Puntland iyo hay’adaha Care, Unicef iyo USAID waxaa ka faa’iideysanaya dadka ku nool deegaanadaas, gaar ahaan kuwa ay abaaruhu saameeyeen si carruurtooda loogu daryeelo. Inka badan 100 shaqaale ah ayaa qorshuhu yahay in ay ka howlgalaan xarumaha.
Madaxweynaha Puntland Cabdiweli Maxamed Cali, ayaa daah-furay Arbacadii (November 28). Haddaba si aan faahfaahin dheeraad ah uga helno ayaa weriyaha Raadio Ergo ee gobolka Sanaag, Maxamed Saalax waxaa uu ka wareystay arrintan isku-duwaha wasaaradda caafimaadka Puntland ee Dhahar, Daauud Maxamed Bardaan. Waxaa uu ugu horreyn weydiiyey bal in uu sharxo waxa uu yahay mashruucan.
