Isbitaalka guud ee gobolka Mudug oo ay soo foodsaartay baahiyo keeni kara inay joogsato shaqada uu dadweynaha uhayo, isbitaalka oo ka kooban 500 oo sariirood ahna kan ugu weyn gobollada bartamaha Soomaaliya ayaa wuxuu leeyahay qaybaha kala ah qeybta gargaarka, degdegga ah, qeybta qaaxada, qeybta dhalmada, qeybta carruurta, qeybta bukaan jiifka, qeybta bukaan socod eegtada, qeybta raajada iyo sheybaarka iyo qeybo kale isla markaasna isbitaalka waxa ku dhex taalla kulliyad caafimaadka lagu barto.
Isbitaalkan oo la dhisay 1935kii ayaa baxsha adeegyo caafimaad oo lacag la`aan ah waxana ka faa’iidaysta dad u badan danyar oo ka kala yimaada meelo kale duwan oo dalka Soomaaliya iyo darsikaba ah, waxana howlo caafimaad oo isugu jira qalliimo iyo daaweyn lacag la’aan ah kafuliya takhaatiir Soomaaliyeed.
Isbitaalka ayaa waxaa gacanta ku haysa wasaaradda caafimaadka Puntland mana jirto muddo saddex bilood ah wax taageero ah oo ka soo gaartay waana intii maamulku is bedelay, wax hay’ad samafal ah oo gacanta ku heysa tan iyo markii ay ka baxday hay’adda MSF, waaxaan tan iyi bixitaankii MSF jiray culays haysta isbitaalka, taasoo hadda keentay siday sheegayaan saraakiisha isbitaalku uu qarka u saaran yahay inuu xirmo.
Agaasimaha isbitaalka guud ee Gaalkacyo Dr Maxamed Xuseen Aadan ayaa Ergo u sheegay inay jiraan baahiyo u baahan in wax lagala qabto isbitaalka oo gacan laga siiyo taas oo ay ka mid yihiin mushaar la’aanta shaqaalaha iyo adeegga kale ee isbitaalku dadweynaha uu qabto.
‘‘Isbitaalku wuxuu maalintii shaqooyin caafimaad oo lacag la`aan ah u qabtaa bukaan gaaraya 600 ilaa 800 oo qof, kuwaasoo u badan dadka danyarta ah gaar ahaan hooyada iyo carruurta, waxana ka shaqeeya oo ka howlgala 300 oo qof oo shaqaale iyo takhaatiir isugu jira, mana qaadan wax mushahar ah tan iyo bishii Diseebar ee 2014, waxaa kaloo jira caqabado keeni kara in shaqadu gebi ahaanba istaagto ayna ugu horreyso daawooyinka gargaarka degdeg ah ayaa hadda gabaabsi ah, qalabka rajadu ku shaqayso ayaa gabaabsi ah, sidoo kale daawooyinka shaybaarka loo isticmaalo ayaa iyana dhamaaday, waxaa kaloo jira dad qaata daawada qaaxada waxana ku jira bukaanno gaaray heerkii xannuunku la qabsan jiray daawada, una baahan xanaano, oo haddii ay ka baxaan meesha ay daawada ku qaataan la kulmi kara khatar, sidoo kale waxaa jira carruur yaryar oo u jiifta cudurada maqaarka, nafaqa daro iyo shubanka qaybta carruurta ee bukaan jiifka ah’’
Faadumo Maxamed Cali waxay isbitaalka guud ee Gaalkacyo ku haysaa hooyadeed oo muddo xanuunsanaysay, waxayna Ergo u sheegtay in isbitaalku u qabtay adeeg caafimaad oo lacag la’aan ah, haddii uu taageero waayana ay waayi karaan adeeggaas islamarkaana aysan awoodin inay goobo kale oo lacag ah ay aadaan.
Canab Kulmiye cali oo ka timid deegaanka miyiga Xarfo kana mida bukaanka ku jira isbitaalka guud ayaa idaacadda Ergo usheegtay inay heleen daaweyn lacag la’aan ah laakiin ay hadda welwel qabaan.
Agaasimaha isbitaalka Dr. Maxamed ayaa sheegay inay la xiriireen maamulka Puntland si arrintaan wax looga qabto, balan qaad ma ahane welise aysan wax ka soo gaarin, wuxuuna kaloo codsi u diray jaaliyaddaha iyo hay’addaha samafalka inay arrintaan gacan ka geystaan.
Burhan/MH
