Hay’adda qaramada midoobey u qaabilsan daryeelka carruurta ee UNICEF ayaa Talaadadii ku wareejisay wasaaradda caafimaadka Puntland 70.000 oo mara-kaneeco ah, taasoo loo qaybinayo dadweynaha magaalada Boosaaso. Adeegga ayaa looga hortegi doonaa cudurka Duumada oo sanadihii dambe kusoo noqnoqday gobolka Bari.
Waxaa ka faa`iidaysan doona mara-kaneecada 35.000 oo qoys oo u badan hooyooyin iyo carruur d`doodu ay ka yartahay shan sano, sida ay sheegtay wasaaradda caafimaadka oo faahfaahisay habka loo bixin doono adeegga.
“Guri-guri ayaa loo tegi doonaa xaafadaha magaalada iyo meelaha ku dhow.” Ayuu yiri madaxa duumada Puntland, Dr. Cabdikariin Xuseen Xasan oo ka hadlayey kulan ka dhacay jaamacadda culuumta caafimaadka ee Boosaaso.
“Dadka nugulka ah ayaan beegsan doonnaa si ay ka hortag ugu noqoto, khaasatan hooyada uurka leh iyo dhallaanka ka yar shanta sano.” Dr. Cabdikariim ayaa sidaas yiri “Muhiimaddu waa in la baahi tiro 50% dadka nugulka ah ee u dhow xanuunka duumada.” Ayuu hadalkiisa raaciyay.
15 qof ayaa u dhintay cudurka duumada sanadkii hore ee 2013, marka la eego deegaannada ku dhow magaalada xeebta ah ee Boosaaso. Isla sanadkaas waxaa la diwaan-geliyay 22.000 qof oo cudurka laga daaweeyey, halka dad kale ay ilaa hadda cisbitallada u jiifaan.
Bilihii ugu dambeeyey sanadkii hore ee November iyo December waxaa xanuunka u dhintay saddex ruux, cisbitaallada Boosaaso ayaa la dhigay bishii hore ilaa 100 ruux oo xanuunka qaba, sida uu sheegay wasiirka caafimaadka Cali Cabdullaahi Warsame oo arrintan ka hadlay bishii hore ee ugu dambaysay 2013.
Wasaaradda caafimaadka Puntland ayaa waaliddiinta Boosaaso ugu baaqday inay carruurta ku hubiyaan inay isticmaaleen mara-kaneecada la bixin doono, waxay ka digeen saraakiisha caafimaadku in la dayaco marada taas oo sahli karta in xanuunku sii kordho.
“Meelaha barakacayaasha iyo danyarta hadda waxaa ka halis badan guryaha magaalada ku yaalla ee leh baraagaha kordhiska ah, sidaas ayaan baaris ku xaqiijinnay.” Ayuu yiri Dr. Cabdikariin Xuseen
Cudurka ayaa si baahsan ugu fiday deegaannada ku dhow Boosaaso, Qandala iyo tuulooyin ku xeeran xeebaha gobolka Bari, isu-duwaha wasaaradda caafimaadka ee gobolka Bari Siciid Maxamed Waraabe ayaa sheegay in gobolka Bari uu sanadihii dambe deris la noqday xanuunka.
Cabdiraxmaan Maxamed Xaaji/FM
