Olole tallaal oo ka socday muddo toddobaad ah MCH-yada afarta xaafadood ee magaalada Beledweyne ayna fulinayeen ururro caafimaad oo maxalli ah oo ay maalgelinaysay hay`adda UNICEF, ayaa waxaa si aad ah uga faa`iideeystay carruur fara badan iyo dumar ku nool xaafadaha Magaaladaasi ay ka koobantahay.
Dhallaanka iyo dumarka ku nool Beledweyne oo aan helin muddo ku dhow labo sano wax tallaal ah, ayaa tirada carruurta ee ka faa`iideystey ay gaareeysaa 10,735, halka dumarka qaatay tallaalkan iyagana ay gaarayaan 3400, sida uu Raadiyo Ergo u sheegay Mid ka mid ah hawlwadeennada diiwaan gelinayay ololahan tallaalka kaasoo codsaday in aan la carrabaabin.
Raadiyo Ergo oo booqday meelo ka mid ah goobihii tallaalka lagu Bixinayay, ayaa xog warran la yeeshay qaar ka mid ah dumarkii u yimid in loo tallaalo carruurtooda “Walaal waxaan MCh-kan ka soo aaday xaafadda Kooshin, wacyigelinta la baahinayo ayaan maqlay, waxaana u imid in
carruurta la ii tallaalo, labo carruur ah ayaan wataa wiil iyo gabar, wiilkeyga hadda ka hor ayuu
tallaal qaatay, tallaalka in uu fiican yahay ayaana ka aaminsanahay.” sidaa waxaa tiri hooyo k amid ah hooyooyinkii u tegay in carruurta loo tallaalo MCH ku yaalla xaafadda Kooshin.
Hooyo kale oo iyadana carruurteeda loo tallaalayay ayaa tiri “ labo carruur oo mid uu afar bilood jiro iyo mid kale ayaan wataa haddana waa la ii tallaalay, carruur aad u dhibaateysan oo jiid iyo jadeeco aad u hayso oo dariskeeyga ah ayaan is leeyahay amey ilmaha kaaga dhacaan, waana
cudur aad u daran oo dilaa ah. Dad deriskeyga ah oo badan ayaa cudurradan carruurta uga dhaceen oo carruur yar yar ka dilay, qaarna hadda waa u bogsadeen.”
Dr. Maxamed Sheekh Xuseen oo ah takhtar ka mid ah takhaatiirta ololahan tallaalka fulinayay oo Raadiyi Ergo u warramay ayaa yiri “ Walaaloow waxaan bixineyno waa tallaalka lixda cudur ee dilaaga ah, oo uu wehliyo kii hooyada teetanada tallaalka kojiyaha ee toddobo-magaartada ah, waxaana bixinaya NGO-ga WARDI oo ay maalgelinayso UNICEF ,waxaa kaloo na wehliya NGO-yada kala ah DOVE, GEELO iyo DOOYAALE, waxaana siinaynaa afarta xaafadood ee magaalada Beledweyne, Haddana waa wejigii koowaad, kii labaad iyo kii saddexaad ayaan bixin doonnaa hadduu eebbe idmo.”
Dr, Maxamed oo hadalkiisa sii wata ayaa yiri “In xilligan adag iyadoo lagu jiro aan olole tallaal sameyno waxaa nagu kallifay cudurro badan oo lagu magacaabo lixda cudur ee dilaaga ah oo waddankii dhibaato adag ku saameeyay gaar ahaan gobolka Hiiraan degmooyinkiisa iyo tuulooyinkiisa, oo ay ugu darantahay jadeecada iyo xiiqdheerta, jadeecada dad badan ayaa u dhintay ama ha yaraadaan ama ha weeynaadaan.”
Ololahan tallaalka ah oo ay ka faa`iideysteen carruur fara badan iyo dumar ku nool Beledweyne, ayaa wuxuu ku soo beegmay xilli xaafadaha magaalada iyo guud ahaan deegaannada gobolka Hiiraan laga sheegayo xanuunno soo ridanaya carruurta, kuwaasoo waaliddiinta deegaanka cabsi ku beeray, sababayna in waalidiinta qaar carruurtooda dugsiyada iyo ka bixidda guriga ay ka celiyaan ,si aysan uga soo qaadin carruurta xaafadda ee qaba xanuunnada, maaddaama cudurro saf mar ah ay yihiin, xaaladaha caafimaadka bulshada ee gobolku muddooyinkan dambe ay waxay ahayd mid liidata.
Cabdullaahi Salaad/FM/MH
