Baardheere: Qoyski ku barakacay fatahaadda oo cunto yari iyo hoy xumo ka cabanaya

0
Keydka sawirrada/Ergo

Sagaal boqol oo qoys oo ku barakacay fatahaaddii webiga  Jubba uu ka gaystay tuulooyin hoos taga degmada Baardheere ee gobolka Gedo ayaa sheegaya inay haysato cunto yaraan, hoy xumo iyo shaqo la’aaan.

Qoysaskan oo nolashoodu ku tiirsanayd wax soo saarka beeraha ayaa guud ahaan biyuhu ka qaadeen dalagayadi u saaraa beeraha.

Deynabo Muxumed oo ku nool xerada barakaca ee Liibaan, ayaa sheegtay in muddo afar bil ah, ay ku nool yihiin hoy ka samayn baakado iyo dhar oo aan celi karin dhibicda roobka.

“Ma haysano cunto, hoy, biyo, gogol iyo adeeg caafimaad toona,maalintii hal mar ayaan soor iyo kablo cunaa, naguma filna laakiin wax kale oo aan samaynno karno ma jiraan”

Daynabo oo qoyskeedu ka kooban yahay 13 ruux ayaa sheegtay in si ay carruurta ugu hesho wixii ay hal wakhti cuni lahaayeen ay u shaqo tagto magaalada ayada soo qaabata shaqooyinka dhar dhaqidda iyo mararka qaar oo ay soo gurto xaabo oo ay iibiso wixii ka soo galana ku maaraysa cuntada yare ee ay maalintaasi cunaan.

Qoyska Daynabo ayaa nolashoodu ku tiirsanayd dalagga ka soo go’a beeraha balse fatahaaddii ayaa baabi’isay, waxayna sheegtay in beeraha waxyaabaha ay biyaha ku reebeen ay u baahantahay shaqo.

“Xilliga roobka wax yar ayaa ka dhiman, hoyigan maaha mid celin kara roobka, hadda xerada ayaan sii joogi doonaa wayo meel aan ku noqon karno ma jirto, waan welwelsannahay”

Qoyska Deynabo ayaa ka soo barakacdey tuulada Xanyaaley oo Baardheere u jirta 7 km, waxayna lahaayeen beer 5 hiktar oo waraab ah, taasi oo ay kaga khasaartay lacag dhan 27 milyan oo shilinka Soomaaliga ah una dhiganta $1038. 

Cali Cabdi xuseen oo ka mid ah Horjoogayaasha xerada Liibaan,oo ah aabbe qoyskiisu ka kooban yahay 9 ruux, kana mid ah dadkan xeradan barakac ku yimid kadib marki dalaggii u beertay ay biyuhu ka qaadeen. Cali beertiisa oo ku taala nawaaxiga tuulada Shimbirole, ayaa waxaa u saarnaa khudaar.

Halkan oo ku sugan yahay ku dhawaad afar bilood, ayuu sheegay in nolasha qoyskiisa ay hadda ku tiirsan yahay shaqo muqruq maal ah oo ay qabtaan laba gabdhood oo u dhalay iyo hooyadood, kuwaas oo ka shaqeeya nadiifinta guryaha iyo dhar-dhaqidda oo aan joogto ahayn.

“Aniga iyo qoyskeyga waxaa ku nool nahay nolol aad u adag maalintii oo dhan hal mar ayaan wax cunna, nagumana filna waxa aan cunno, waa shaqo muruq maal oo aad u adag” ayuu yiri Cali Cabdi Xuseen.

Qoysaskan ayaa markii hore ahaa qoysas ka shaqeysta beeraha waraabka ee ku  yaala qaar ka mid ah tuulooyinka hoos yimaada Baardheere, iyagoona suuqyada Baardheere keeni jiray dalagyo u badnaa khudaar.

Faadumo Aden iyo qoyskeedu waxay ka soo barakaceen tuullada Damballey oo Baardheere u jirta 7 km, hadda waxay ku nooshahay xerada barakada ee Liibaan.

 “Afar saac habeenimo ayay biyo na soo galeen carruurta ayaan kala baxnay, alaabti iyo gurigi wali way is dhexyaalleen, xilligaasi waxaa naga baaba,ay dhammaan waxii dalag ee noo baxayey, khasaaro ayaa nagu dhacay, waana ka soo kaban la’nahay, xeradan barakaca ayaan joognaa waxba ma haysanno meel aan aadno ma naqaano, matooradii iyo qalabkii beeraha webiga ayaa nagala tagey” sidaasi wax tiri Faadumo Aden .

Cabdullaahi ismaaciil Nuur oo ah Madaxa Arimaha Bini’adanimada iyo Mashaariicda  Maamulka degmada Baardheere ayaa sheegay in haddii dadkaan aan degdeg wax loogu qaban qoysaskan ay imaan karto xaalad ka daran midda ay hadda ku sugan yahiin. 

 

Jawaab ka bixi

Please enter your comment!
Please enter your name here