Garowe: Gabar iyada oo shan maalin ummul ah gashay imtixaanka dugsiga sare

0
Faa'iso oo u fadhisa imtixaanka iyadoo gurigeeda joogta/Maxmed Saalax/Ergo

(ERGO) – Faa’iso Axmed Khaalid oo ah 20 jir waxay kamid ahayd in ka badan 16 kun oo arday oo dhigta dugsiyada dhexe iyo sare ee Puntland oo imtaxaankii shahaadiga ahaa uu u soo dhamaaday toddobaadkii la soo dhaafay.

Faa`iso waxay u fariisatay imitixaankii ugu dambeeyay ee fasalka 12-aad ee dugsiga sare ee Gambool ee magaalada Garoowe, waxayna imtixaanka gashay iyadoo shan maalmood keliya umul ahayd, weliba lagu soo qalay ilmaha.

Faa`iso waxaa loo suurtageliyay iney imitaxaanka ku gasho gurigeeda, iyadoo loo sameeyay qof imtaxaanka u keena kuna ilaaliya. Waxayna Raadiyo Ergo uga sheekeysay sida ay uga welwelsanayd inay hal sano dib u dhici karto haddii ay haleeli waydo imtaxaanka xilligiisa.

“Hore waxaan uga welwelsana in imtixanaka iyo dhalmadu isaga kay beegmaan, markii hore imtixaanka waxaa la geli laha 2-dii Juun, waxaanan umulay 21-kii bisha, markaa aad baan uga welwelsanaa, balse markii dib lo dhigey waan ku farxay, haddana asaagay ayaan imtixaanka la galay, waxaan goostay in aanan marnaba ka harin imtixaanka.”

Safiyo Cabdullahi Cali oo ah gabadha u xilsaarnayd imtixaanka ayaa Raadiyo Ergo u sheegtay inay Faa’iso oo ka geddisnayd xaaladda ay imtixaanka ku gelaysay loo oggolaaday in ilmaha ay nuujiso, islamarkaasna loo fududeeyay xaajooyin kale, maaddama ay ahayd qof qalliin soo maray dhowaan.

“Maaddooyinkana qofka wey kiciyaan mid baa fudud mid baa adag, iyana waa qof iska xanuunsan, waxyaabaha ay u baahan tahay waxa weeye in ay ilmaha nuujiso, xamaamka gasho, iyo in ay nasato anoo ilaalinaya shuruucda imtixaanka, tusaale in ilmaha loo keeno oo ay nuujiso kaddibna la ceshoy.”

Faa’iso waxaa la guursaday iyada oo fasalka 11-aad ah, waxayna curatay iyada oo u fariisan rabta imtixaankii kama danbaysata, guurkeeda caqabad uma aragto, waxayna farriin u waddaa hablaha kale.

“In aad guursatid oo guri leedahaay caqabad ku noqon mayso in aad waxbarato, haddii ay niyad kaa tahay, waxbarashadaada iyo guurkaaga waa isku wadan kartaa, waxaan rabaa in aan sii wato waxbarashada ilaa heer jaamacadeed ama PHD,” ayay farriinteeda ku tiri Faa`iso.

Wasaaradda Waxbarashada Puntland waxay leedahay fayl gaar ah oo loogu talogalay dadka xaaladahan oo kale la soo darsaan, waxaana maalin kasta Faa’iso laga qoraaay warbixin, sida ay sheegtay Safiyo.

“Imtixaankan sidiisaba wasaaradda waa fududaysay, maaddaama Koroona jiray, qofka xanuunsanna wasaaradda waxay u samaysay fayl gaar ah iyo warbixin laga qoro maalin kasta wax kasta oo ku yimaado, waxaanan rajeynayaa in warbixintaasi wax fiican ka gudbin doonto.”

Ardeyda deegaannada Puntland waxay labadii bilood ee la soo dhaafay casharrada ka qaadanaayeen warbaahinta maxalliga ah iyo internetka, taas oo ardayda u suurtagelisay inay galaan imitixaanka shahaadiga ah.

 

Jawaab ka bixi

Please enter your comment!
Please enter your name here