Haween u shaqo-doonta degmada Dhadhaab oo caqabad ka haysata aadisteeda

0
Haween qaxooti ah oo u kala lugeynaya xerada Ifo iyo degmada Dhadhaab/ Axmed Cabdullaahi/Ergo

(Ergo) – Xaawo Cali Yarow oo ka mid ah 50 haween ah oo shaqo u doonta degmada Dhadhaab ayaa Raadiyo Ergo u sheegtay in jidkan ay ku lugeyso labaatan maalmood bishiiba, dhaqaalaha yar ee ay ka soo hesho shaqadaasna ay ku kabto nolosha qoyskeeda oo ka kooban 12 qof oo wax shaqeeyaa aanu ku jirin.

Waxay Xaawo intaas ku dartay in ay dhibaato badan ku qabto masaafada dheer oo ay ku lugeyso oo 14 km ah, iyadoo muddo labo sano ah ay hore iyo gadaal ugu socotay waddadan, laakiin aanay haynin fursado kale ay ku beddelato, kaalmada yar ay ka helaanna ha`yadadaha qaxootigana aanu ku filnayn qoyskeeda.

“Maalin-maalin wax baan soo helaa maali-maalinna wax baan soo waayaa, carruur baa dugsi kuu gu jirta oo wax kastaa lagaa rabaa, haddee raashin ma laha e xaggee ka soo qaadi, kii Care-na waa kaa dhamaadaaye, labo bilood oo la isku daray intuu gaari.”

Xaawo waxay xeryahan soo gashay sanadkii 2011-kii, iyadoo markaas ka soo qaxday magaalada Salagle oo ka tirsan gobolka Jubada dhexe markii abaar ku dhufatey degaankaas, kana baabi`isay beer halkaas ugu tiillay.

Xaawo iyo haweenka ku lugeeya jidka u dhexeeya xerada qaxootiga ee Ifo iyo magaalada Dhadhaab ayaa sheegaya in xaaladdoodu aad uga sii dartay 45-kii maalmood ee ugu dambaysay markii la joojiyay gaadiidkii halkaas ka shaqayn jiray cudurka Koroona awgii. Gaadiidleyda ayaa sida badan dadkan ku caawiyi jiray iney waddada ka sii qaadaan si ay u gaarsiiyaan magaalda Dhadhaab.

Ciidamo Osgoo Xasan oo ka tirsan haweenkaas ayaa ka mid ah kooxda haweenka ah ee ku lugeeya jidka isku xira Dhadhaab iyo Ifo. waxay sheegtey in dhaqaalaha yar ee ay ku qaadato sida maalin-dhaafka  ah aanay ku fillayn baahida qoyskeeda, sidaa darteedna ay ku khasbanaatey in ay maalinta aanay u tagayn qoyska ay u shaqeyso ay raadsato shaqo kale oo ay qabato.

Ciidamo waxay xustay in shaqadan adag ee ay qabataa ay ku tiirsan tahay nolosha qoyskeeda oo ka kooban shanta qof oo ay ku jiraan saddex carruur ah oo ay dhashay oo da’doodu u dhexeyso 2 ilaa 10 sano iyo Saygeeda oo shaqo la’aan ah.

“Raashinka labo jeer baa wax la karinayaa saddex maba jirto, Subixii quraac baa la soo dubanayaa digir bajaqey baa la soo kor saaranaa iyo shaahaas oo mar la helaayo marna la weynaayo.”

Muslimo Isaaq Cali oo ka mid ah haween ka shaqeeya magaalada Dhadhaab ee ka soo aada xerada Ifo ayaa sheegtay in culayska dhinaca nolosha ah ee ka jira qoyskeeda uu dhaxalsiiyay dhibaatooyin ay ka mid yihiin in ay qabato shaqo nadaafadeed oo sida ay sheegtay iyada lafteedu ay dhibsato qabashadeeda laakiin ay dantu ku riixeyso oo aanay haynin waddo kale oo ay ku korin karto carruurteeda qaxootiga ah. waxay xustay in dhibka labaad ee ay qabtaa uu yahay jidka dheer ee ay lugayso.

” Waddada dhib baan ku qabnaa oo Ilaahay boqorka ah naga qaadi karo,  maamo shalay inta ay lugaysey oo hor iyo gadaal u lugayso, hadana aminkan ay socoto sow dhib ma qabto?  nolosha ayaa nagu kaliftey, wuxuu Ilaahay noo qorey mooyee wax kale oo aan meel ku og nahay ma laha,” ayay tiri Muslimo.

Muslimo waa hooyada saddex carruur ah oo ay aabohood kala tageen, iyada keliya ayaana u shaqeysa qoyskeeda, waxayna sheegtay in carruurta aabbahood uu ka soo tagay Soomaaliya toban sano ka hor.

Waddada dheer oo ay haweenkan ku lugeeyaan baa ah mid dhir badan oo duur ah oo cabsi badan taasaana keentay iney haweenkan isula socdaan koox-koox.

“Hadda ka hor nin baa inta uu igu tarriigsaday aan rafaad iyo silic kala kulmay, wuu i qabsadey, saddex wiil oo Ifo-1 ka soo baxdaa iga fujisey,  rafaad iyo silic jidkan waa ku qabnaa, waa iska sii wadanayaa, waayo hunguri baa i haya,” ayay tiri Muslimo oo la ciishooneysa duruufta iyo nolosha rafaadka ah ee ay ku nooshahay.

Jawaab ka bixi

Please enter your comment!
Please enter your name here