Reer miyiga oo isa-sii-gaarsiinaya wacyigelinta cudurka Koroona

0

(ERGO) – Cabdisalaam Axmed Jaamac oo xoolo ku dhaqda miyiga deegaanka Balli-dhiig ee gobolka Togdheer wuxuu go`aansaday inuu si mutadawacnimo ah dadka reer miyiga ah uga wacyigeliyo halista cudurka Koroona, lana wadaago talooyinka looga hortagayo cudurka ee uu idaacadaha ka dhegeysto, sida kala fogaanshaha, gacmo-dhaqashada iyo is-booqashada ama safarka.

‘Miyigii markii cidi iman wayday, cid wacyigelisa ay waayeen ayaan aniga iskaa-wax-u-qabso isku diray, in magaaladii xanuunno ka dillaaceen, dalkeenna iyo debadahaba, xanuunkaas oo la yiraahdo Korona Fayris, xanuunkii mid dalka ku fidaya weeyaan,” ayuu yiri Cabdisalaam.

Wuxuu Raadiyo Ergo u sheegay inuu haysto raadiye uu ka dhegeysto mowjadda gaaban, si joogto ahna uu ula soco tebinta Raadiyo Ergo oo ay ku jiraan wararka iyo warbixinnada la xiriira Koofid 19. Wuxuu farriimaha uu idaacadda ka dhegeysto ku sii dhex faafiyaa bulshada, gaar ahaan haweenka iyo dhallinyarada oo laga yaabo in aanay warbaahinta la socon.

” Dhallinyarada markii ay qabanayso magaalada waan u sheegaa oo waan la hadlaa oo waxaan iraahdaa magaaladii baad ku socotaan, haa, iska joogaan idin oran lahaa, haddii aydan ka joogaynin meel basar leh fariista oo dadka ka fogaada xanuunadaasaa soo galay dalkee.”

Cabdisalaam wuxuu bishii hore Raadiyo Ergo kala soo xiriiray telefoonka bilaashka ah, isagoo noo sheegay in warbixinnada idaacadda ay dadku si aad ah u soo dhoweeyeen. Wuxuu sheegay in deegaankiisa aysan gaarin idaacadaha FM-ka laga dhegeysto, waxayna bulshadu ku tiirsan tahay xogta ay ka hesho Raadiyo Ergo iyo wararka caalamiga ah iyo arrimaha markaas taagan oo ay kala socdaan Laanta Af-Soomaaliga ee BBC-da.

Siraad Cawil waa hooyo ku nool miyiga deegaanka Balli-dhiig ee gobolka Togdheer, gacantana ku haysa qoys ballaaran oo ka kooban dhowr iyo toban qof oo isugu jira kuwo ay dhashay iyo kuwo ay ayeeyo u tahay. Waxay ka mid tahay bulshada miyiga ee sida fican u fahmay cudurka Koroonaha iyo sida looga hortagayo, waxayna la qaybsataa dadka reer miyiga ah macluumaadka ay ka hesho Cabdisalaam.

Siraad waxay Raadiyo Ergo uga sheekeysay sida ay u qaataan talooyinka caafimaad ee ay helaan.

“Waa nala wacyigeliyaa oo ninkaas baan naga wacyigeliya badanaa. Meelahaas mujtamacyada aad ha ugu ururina buu yiraahdaa, qofkii aad ka shakidaan ee xanuunsanaya ha u tagina ama ha la dhaqmina. Magaalada aad ha u tagina, haddii aad tagtaanna meelaha iyo hoteellada ha fariisanina, siyaabo badan oo sidaas ah buu nooga wacdigeliyaa, dabeed annaguna waan iska ilaalinnaa.”

Waxay intaa ku dartay in natiijada wacyigelinta darteed ay haweenka miyiga xaddideen isu-imaashaha oo qoysna uusan qoys kale u gelin. Waxay xustay in reer kasta uu ku dadaalo in aysan ka go’in saabbuunta iyo biyaha si ay faraxalka u joogteeyaan, iyadoo tilmaantay in dadka ay saabbuunta ka go’do ay isticmaalaan dambas.

Ismaaciil Axmed wuxuu isaguna ka mid ah dadka ku nool miyiga Balli-dhiig ee qaatay fahamka wacyigelinta caafimaadka ee Koroonaha ee uu wado Cabdisalaam. Wuxuu u istaagay inuu la wadaago wacyigelinta dadka reer miyiga ah si ay uga taxaddaraan in aanu u soo dhuuman bushi-sidaha Koroona.

“Annaguna waan sii gaarsiinnaa oo waxaan u sii gudbinnaa dadka kale oo ninba ninkuu arko buu u sii gudbiyaa, una sheegnaa inuu xanuunkani yahay mid halis ah oo dilaa ah oo aan dawo loo hayn,” ayuu yiri.

Sida badan magaalooyinku waxay ku xiran yihiin nolosha miyiga oo waxaa looga keenaa caanaha, xoolaha iyo miraha beeraha, sidaas darteed kalama maarmaan iny mar kasta isu socdaan oo ay kala adeegtaan.

Jawaab ka bixi

Please enter your comment!
Please enter your name here