Joojinta duulimaadyada oo saameysay dadkii ka shaqeynayay shirkadaha tigidhada jara

0
Sawir/ Mid ka mid ah dadka ka shaqeeya shirkadaha/Cabdiwahaab Maxamed/Ergo

(ERGO) – Shirkadda Qaran Travel oo ka shaqeysa adeegga tigidhada diyaaradaha ayaan wax adeeg ah qaban tan iyo intii ka dambaysay 19-kii bishii Maarso, taasoo sababtay hakadkii ku yimid duulimaadyadii dayaaradaha cudurka Koronaha dartiis.

Saalax Xasan Jidhaan oo ah maamulaha shirkaddan ayaa Raadiyo Ergo uga warramay xaaladda iyo dhibaatada la soo gudboonaatay isaga iyo lix shaqaale ah oo halkan ka wada-sahaqeeya. Wuxuuna ka warbixiyay in halkan ay u ahayd isha dhaqaale oo ay ku tiirsanaayeen, haddana ay aad u adkaatay halkii ay ka heli lahaayeen masaariiftooda.

Saalax oo si gaar ah uga warramaya xaaladda qoyskiisa ayaa tilmaamay inaanu hayn iminka wax dhaqaale ah ee uu ku kala dabbaro waxbrashada carruurtiisa oo qaarkood dhigta jaamacado iyadoo ay u sii dheer tahay masaariifta reer ka kooban toban qof.

“Run ahaanti culeyska ugu wayn waa dareemi kartaa alabaab labo bil iska xiran, kiradii laga rabo, korontadii laga rabo, shaqaalihii isaga ay sugayaan, oo ay u xayiran yihiin oo albaabkaas meelaan ahayn aysan firiineeyn, sameeyn wayn ayuu nagu yeeshay.”

Maalinkii ugu yaraan 15 qof ayay u qaban jireen adeegyada ay u baahan yihiin ee duulimaadka la xiriira kuwaasi oo isugu jiray kuwa u dhoofaya dalka dibaddiisa iyo kuwa kale oo u socdaalaya magaaloyinka  dalka gudihiisa.

Waxay sidoo kale xaruntu ka shaqeysaa soo-saarirsta fiisooyinka caafimaadka iyagoo dadka xanuunsan ka caawin jiray inay helaan adeeg caafimaad oo dalka dibaddiisa ah, sida uu Raadiyo Ergo u sheegay Saalax. Wuxuu kaluu quus ka sheegay inuusan u jeedin rajo dhaqso ah iney dib u furmaan duulimaadyadii caalamiga ahaa iyo kuwa gudaha, waxaana sii dabadheeraaday halistii Koronaha iyo inaan weli loo helin wax xal ah ama dawo ah.

Arrintan waxay saameeysay dhammaan shirkadaha ka hawgala arrimaha tikidhada iyo duulimaadyada oo dhammaantood maanta aanan hayn wax shaqo ah, isla markaasna ayan jirin meelo kale oo ay wax ka soo galaan,

Ibrahim Cabdulqaadir waxaa uu ka shaqeynayay xarunta Alla Uun Travel qeybteeda Soobbe ee magaalada Muqdisho. Waxaa uu Raadiyo Ergo u sheegay in caqabadaha ay kala kulmeen hakadka duulimaadyada oo ay ka mid tahay in shaqadii ay ka joogsatay oo xitaa ay iska bixin la’yihiin kiradii iyo korontadii oo ku socota xafiisyadooda, sidaas darteedna ay isaga iyo toddobo kale oo ay xafiiska ka wadashaqaynayeen ay yihiin maanta kuwa shaqo la`aan ah.

Ibarahim waa aabbaha qoys ka kooban 15 qof oo masaariifta ka sokow ay horyaallaan kharashaad dhinacyo badan oo ay ka mid yihiin waxbarashada iyo caafimaadka oo dhammaanba uu ka dabbari jiray shaqadiisa, haddana ay ku soo furmeen mawjado badan. Waxaa kaloo uu tilmaamay in xilligan oo kale uu ahaan jiray xilliyada ay ku xisaabtami jireen.

“Xilliyada Cumrada iyo xajka uu jiro,  labo boqol ilaa seddex boqol qof ayaa loo shaqayn jiray maalintii, hadda oo kale waxay ahayd waqtiyada ugu mashquulka badan, waqtiga kaliya aan ku xisaabtami jirnay.”

Guud ahaan dhaqaalaha dalka dhinacya badan ayuu ka saameyay cudurka Karoona, waxaana jirta cabsi laga qabo hoos u dhac ku yimaadda dhaqaalaha waddanka, markii aad eegtid waxyaabihii dalka laga dhoofin jiray iyo kuwa la soo waaridi jiray, kuwaasoo sal u ahaa dhaqdhqaaqa iyo safarrda oo ay sahli jireen dulimaadyada oo isku socodka dadka iyo badeecadaha kuwaasoo muhiim u ahaa korriimaha dhaqaalaha.

Axmed Shikh Cabdullahi oo ah Madaxa Machadka Tababarada Iyo Cilmi Baarista CTC ahna dhaqaalyahan ayaa sheegay in xitaa ganacsigii yaryaraa uu sameeyn wayn ku yeeshay taasi oo sababtay in kuwo badan ay bixin waayaan daymihii ay qaateen si ay ugu kabtaan ganacsiyadooda. Wuxuu tilmaamay in ay xirmeen qaar ka mid ah ganacsiyaadaasi oo dadkii lahaa ay sii wadi waayeen.

Axmed ayaa sheegay in dowladda Soomaaliya ay canshuur dhimis u sameeysay gancasatada si culeyska looga yareeyo bulshada haddana taasi waxay keeni kartaa in ay hoos u dhigto misaanyadda dalka maaddaama ay istaageen ilo badan ee dhaqaale oo laga wada faa’iidi lahaa.

 

 

Jawaab ka bixi

Please enter your comment!
Please enter your name here