Puntland: Haween laga taageeray inay dib u furtaan ganacsigoodii oo ku burburay daadadkii Qardho

0
Kayd/Ergo

(ERGO) – Deeqo Ciise Cali waa hooyada 5 caruur ah, ganacsigeeda oo ku salaysnaa iibinta dharka dumarku xirtaan ee loo yaqaanno baatiga ayaa ku burburay fatahaaddii ka dhalatay roobab xooggan oo Qardho ka da’ay 28kii bishii hore.

Labaatan beri kaddib waxay dib u bilowday ganacsigeeda kaddib markii ay lacag kaalmo ah oo 350 doollar ah ka heshay bangiga ganacsiga ee Amal kaasoo 70 haween ah oo ay ku jirto ka caawiyey inay ganacsigooda dib u yagleeshaan .

” Lacagta hadda la i siiyey waxaa ka badan khasaaraha jira waayo waxaan u soo adeegtey ciidda, dharkii aan doonayey inaan ciidda gado roobkii baa la tegey.”

Deeqo hadda waxay ku faraxsan tahay inay heshay lacag ay dib ugu bilaabato ganacsigeeda iyadoo rajeynaysa inay ka soo kabato khasaaraha soo gaarey . Waxay intaas ku dartay in weli uusan suuqu si fiican u furmin, tirada dadka wax gadanaysana ay aad u yar tahay oo dadka khasaaro ayaa soo gaarey, xawligii wax iibsashada ee suuqa wayn ee Qardhona uu hoos u dhacday.

” Amal bank waa ku mahadsan-yahay inshaa Allaah waan u hamblayaynayaa goor-walba waa na garab taagan yahay”

Hooyo Saytuun Maxamed Maxamuud waxay ka mid tahay dadka iyaguna barnaamijkaan ka faaidaysatay, waxay Radio Ergo u sheegtay in ganacsigeeda inta badan uu roobkii da’ay la tagay, haddana ay dayn kale dib ugu furtay, waxaana ay ka mid noqotay dadka Amal Bank ka helay lacagaha caawimadda ah.

” Ilaa lix gaari baa laga raray oo ah alaab qashin noqotay, wuxuu Ilaahay keenay weeye hadda Ilaahay uun baa loo cabanayaa war kale ma leh.” ayay tiri Saytuun oo cabbireysey dareenkeeda khasaaraha soo gaarey.

”Anigu kolay waxaan aaminsanahay qof kaloo isu taagay shacabkaan maba garan karo oo wax u qabtay, tiriibkii hore oo ay lacag na siiyeen, qaybna noo cafiyeen qaybna na dhaheen iska soo bixiya 300 oo dollar, wax fiican bay kuu qaban kartaa”.

Maamulka Bangiga Amal oo ah bangi ganacsi oo sameeya maalgelin-ganacsi oo faa’iido doon ah ayaa Radio Ergo u sheegay in haweenka laga caawiyey dib-u-soo-kabashada ganacsigooda ay yihiin 70 oo suuqa ku ganacsan-jiray, dhammaantoodna ay shirkadda Amal horay u siisay maal-gelin dayn ah oo dhamayd 500 doollar qofkiiba, taasoo ay si hafto ah ku bixin jireen. Waxaana maamulka Amal go’aansadeen in haweenkan ganacsigoodii loo soo celiyo si ay dayntii hore si hafto ah isaga bixiyaan, iyaguna noloshooda dib ula soo noqdaan.

Haweenkan la caawiyey ayaa 30 ka mid ah ganacsigoodu gebi ahaanba burburay halka 40 ka mid ah uu qayb ahaan u badbaadey ganacsigooda waxaana lacagaha la siiyey lagu saleeyey mid walba heerka khasaaraha ee gaarey iyadoo tan ugu badan la siiyey 400 oo doollar halka tan ugu yarna la siiyey $100 dollar, lacagaha guud ee arrintan ku baxday ayaa dhan 15 kun oo doollar sida uu Radio Ergo u sheegay Yuusuf Salaad Maxamuud oo ah maamulaha Bangiga Amal xaruntiisa magaalada Qardho.

Dabayaaqadii bishii Abriill daadadkii ka dhashay roobabkii mahiigaanka ahaa ee ka da`ay magaalada Qardho iyo agagaarkeeda ayaa sababay dhibaatooyin badan oo naf iyo maalba leh, iyadoo halkaasi ay ku dhinteen siddeed qof islamarkaasna saameyn ku yeeshay siddeed kun oo qoys , kuwaas oo 3500 ka mid ahi barakaceen, waxayna baabi`iyeen hanti u badan guryihii ay dadku degganaayeen iyo kuwii ganacsiga.

Post your comments

Jawaab ka bixi

Please enter your comment!
Please enter your name here