Fatahaadda webiga Shabeelle oo saamayn weyn ku yeelatay suuqa qudaarta ee Gaalkacyo

0

(ERGO) – Waxaa sare u kacay qiimihii qudaarta ee suuqyada Gaalkacyo, taasoo ay ugu wacan tahay roobabkii waa weynaa  iyo fatahaadihii webiga Shabeelle oo saameeyay gawaaridii xamuulka ee iyagu ka soo daabbuli jiray qudaarta magaalda Beledwayne iyo koofurta guud ahaan oo qaarkood waddada fariistay. Arrintan waxay dhibaato u keentay dadka quuta qudaarta ka sokow dadkii ka ganacsan jiray oo ay qoysaskoodu ku tiirsanaayeen.

Nadiifo Cumar Muuse oo ah hooyada shan carruur ah, waxay tabakaayo yar oo qudaarta lagu iibiyo ku leedahay suuqa Gaalkacyo, miiskeeda ma saarna wax qudaar ah iyo mirihii ay halkan ku iibin jirtay, maadama aysan iman baabuurtii badnayd ee koonfurta ka keeni jirtay qudradda. Waxay Raadiyo Ergo u sheegtay in sababta ay weli suuqa ugu jirto ay tahay oo keliya in ay shaqadeedii socoto.

Arrintan waxay saameyn ku yeelatay nolosha qoyska Nadiifo oo ku tiirsanaa wax soo-saarka shaqada tabakaayadeeda, iyadoo ka heli jirtay lacag dhan $7 doollar oo faa`iido ah maalin walba.

“Wax hadda faa’iido ah oo naga soo gala malahan, dadkii naga sii gadan jirayna dhibaato wayn bey ku qabaan”.

Dukaankeeda waxa ugu badan ee uu hadda iibiyo waa basasha iyo baradhada ka timaadda Itoobiya si aan ganacsigeedu u istaagin, laakiin waxay sheegtay in ay khasaare kala kulanto,  maadaama dadku aysan iibsanayn haddii aysan wahlin qudaarta cagaaran.

Waxa ay ka walwalsan tahay sida ganacsigeedu ku sii jiri karo, labadii toddobaad ee u dambeeyay faa’iido ay hesho daaye lacag dhan $350 ayaa ka khasartay markii qudaar ay u dirsatay Baladwayne gaarigii siday ay jidka biyo ku xayireeen, halkaasoo muddo siddeed maalin ah uu ku jiray.

“Basasha oo kale qiimaha ay gaartay abidkeen maanan soo arkin, meeshii laga siin jiray $20 kiishka ama ka yar $60 doller bey maraysa, kiilo ahaan waxaa la gadi jiray 25 kun oo shillin hadda waxay mareysa $2″

Qaar ka tirsan haweenkaas ayaa suuqa iskaga baxay halka kuwa kalana wali ay ku sii adkaysanayaan xaaladdan iyaga oo khasaaro la kulamaya maxaa yeelay ma yaqaannan xirfad ama shaqo kale oo ay kaga dabaashaan.

Guddiga ganacsatada qudaarta suuqa Gaalkacyo ayaan ka ogaannay in ka hor fatahaadda wabiga maalinkii oo kaliya ay 8 ilaa 10 gaari oo qudaar sida ay imaan jireen magaalada, xilligaanse in toddobaadkiiba la sugo hal gaari, sida ay Raadiyo Ergo u xaqiijisay Xaadsan Axmed Salaad gudoomiyaha guddiga qudaarta. Waxay kaloo Xaadsan noo sheegtay in tobanaan ganacstada ah ay hakiyeen ganacsigooda qudaarta markii ay kala kulmeen khasaarooyin ayan awood u lahayn in ay dib isaga gudaan.

Ganacsatada qudaarta ee ku shaqo beelay xaaladdan waxaa ka mid ah Maxamuud Cabdi Aadan oo muddo toddobaad ah ay xiran tahay goobtiisa ganacsiga ee qaraha, cambaha iyo mooska. Maxamuud wuxuu khasaaray $600, taasoo ugu wacnayd markii gaarigii qudaarta waday uu waddada dhowr maalmood kula soo jiray, sidaasna ay ku xumaantay.

“kharash badan baa kaa galaya marka ay halkan timaado kala barna waa khasaaro” ayuu yiri Maxamuud

Maxamuud ma hayo qorshe aan ahayn in uu sugo inta biya-baxadu dhamaanayso oo qudaartu sidii hore ku soo laabanayso. Wuxuu Raadiyo Ergo u sheegay in xaaladdani aysan weli nolol ahaan u saamayn qoyskiisa oo ka kooban lix ruux maadaama uu xilligan ku baxsanayo lacago kayd ah oo uu hore u dhigtay iyo daymo uu ku lahaa dad ganacsi dhex maray oo uu doonto.

“Si kale oo la yeeli karo ma jirto, hadda waan joojinnay toddobaad, waxba lama dirin waxba ma yimaadan ”

Jawaab ka bixi

Please enter your comment!
Please enter your name here