Dhallinyarada caafimaadka baratay ee Somaliland oo si mutadawacnimo ah isugu diiwaangelinaya la-dagaallanka Covid 19

0
Keydka sawirrada/Ergo

(ERGO) – Lix iyo tobankii qof ee ugu horreeyay oo kalkaaliyayaal caafimaad ah ayaa loo tababaray inay la tacaalaan bukaannada uu soo rito cudurka Kofid 19 iyo ka-wacyigalinta bulshada ee cudurkaasi si loo xakameeyo inuu ku baaho deegaannada Somaliland. Waxay kalkaaliyaashu ka shaqayn doonaan dawo-siinta iyo daryeelka bukaannada iyagoo beegsanaya sariibadaha, maqaayadaha cunnada iyo xaafadaha ay deggan yihiin dadka soo barakacay.

Cabdillaahi Maxamuud Xasan oo ah agaasimaha hay’adda Havayoco oo tababarkan siisay kalkaaliyeyaashan ayaa Raadiyo Ergo u sheegay in qorshahan loogu talagalay yareynta halista cudurka si aanu bulshada ugu faafin.

“Waxaa loo sameynayaa qorshe maalinle ah, waxaana ay shaqeynayaan wiigii afar maalmood waxaana loo diyaarinayaa dhammaan qalabkii ay ku shaqeysan lahaayeen.”

Saddex boqol oo kalkaaliyeyaal caafimaad ah oo si mutadawacnimo ah isaga diwaangaliyay wasaaradda caafimaadka Somaliland ayaa iyaguna qaadan doona tababarkan oo kale si ay uga shaqeeyaan ka hortagga iyo la-tacaalidda bukaannada qaba cudurka Covid19.

Cabdillaahi waxaa uu Raadiyo Ergo u sheegay in gobollada oo dhan la gaadhsiinayo dadka ay tababareen si ay wacyigelinta iyo xakameynta fayraska uga caawiyaan bulshada aan heli karin telefishinnada iyo idaacadaha.

Xamda Aadan Guuleed oo ka qeybgashay tababarkan kalkaaliyayaasha lagu siinayay qaabka ay wacyigelinta u gaadhsiin lahaayeen bulshada ayaa Raadiyo Ergo u sheegtay in la baray qaabka ugu habboon ee loo faraxasho, muhiimadda ay leedahay kala fogaanshaha iyo in uu ka hortaggu ka fiican yahay daweynta.

Gabadhan oo culuumta caafimaadka guud ka dhameysay jaamacadda Golis ee magaalada Hargeysa ayaa xustay in markii ay maqashay in loo baahan yahay dad bilaash ugu shaqeeya bulshada oo caafimaadka bartay ay is diiwaangalisay si cilmiga ay baratay ay bulshada ugu celiso.

Madaxa fayo-dhowrka ee wasaaradda caafimaadka Somaliland Dr. Cabdiwahaab Cabdinuur Nakruuma waxaa uu sheegay in muddo labo toddobaad ah oo si iskood ah ay u wadeen wacyigelinta ay dadku yareeyeen imaatinka goobaha lagu badan yahay, sidoo kalena ay bulshadu badsatay faraxalka.

Cabdiwahaab ayaa ka warramay muhimmadda ay leedahay in goobaha lagu badan yahay sida sariibadaha wacyigelinta lagu badiyo. Wuxuu kaloo sheegay inay ugu talagaleen xooggana saarayaan xilliga dumarka iyo hooyooyinka ay joogaan suuqyada iyo xilliga salaadaha kaddib oo u arko inay ku habboon yihiin gaarsiinta farriimaha caafimaad ee ka hortagga cudurka halista ah ee dadka.

Nimcaan Ismaaciil Cali oo kalkaaliyayaasha mutadawiciinta ah ka mid ah ayaa aaminsan in qorshaha ay ku shaqeynayaan ee iskaa-wax-u-qabsada ah uu badbaadin karo bulshada sababtaasna ay u billaabeen inay shaqeeyaan.

“Horta maanta waxaan isku abaabulnay annagu inaanay ahayn maalintii lacag la eegi lahaa maaddaama ay muhiimaddu tahay inaan dadkayaga badbaadinno, si mutaddawacnimo leh ayaan isku abaabulnay una wadaynaynaa, waqtigu ha dheeraado ama ha gaabnaado,” ayuu yiri Nimcaan.

Guddida u diyaargarowga cudurka Covid 19 ee Somaliland ayaa horraantii bishan xirfadlayaasha caafimaadka kula taliyay inay si mutadawacnimo ah isu-diwaangaliyaan si ay bulshada uga badbaadiyaan cudurka safmarka ah oo saameyn ku yeeshay nolosha boqollaal kun oo qof oo ku nool adduunka.

Post your comments

Jawaab ka bixi

Please enter your comment!
Please enter your name here