Kulliyadda Culuumta Caafimaadka Jaamacadda PSU oo soo saartay Jeermis- dile

0
Shaybaar
Keydka sawirrada/Ergo

(ERGO) – Waaxda cilmiga daawooyinka ee kuliyadda caafimaadka Jaamacadda Puntland State University ( PSU), ayaa tijaabo ahaan u soo saartay jeermis-dile (alcohol) oo gacmaha lagu dhaqdo. Tijaabadan oo ah markii u horreysay oo ay jaamacaddu ku dhaqaaqdo waxaa fekerkeed iska lahaa macallimiinta wax ka dhiga kulliyaddaas.

Tallaabadan ay qaadeen maamulka iyo macallimiinta kulliyaddan ayaa yimid kaddib markii ay arkeen baahida wayn ee ka timid cudurkan dunida ku faafaya ee Covid 19, isla markaasna ay sii dhamaanayso wixii lagula tacaali lahaa nadaafadda oo ay kamid yihiin waxyaabaha lagu mayro gacmaha oo badanaa debadda ka yimaadda qiimahooduna uu yahay mid sarreeya.

Cabdiraxmaan Aadan Gambool oo ah maamulka waaxda shaybaarrada ee kuliyadda caafimaadka jaamacadda PSU hormuudna u ahaa wax soo saarkan ayaa sheegay in fikraddan uu la wadaagay maamulka Jaamacadda iyo macalimiinta kuliyadda, kuna guuleysteen laba toddobaad kaddib iney soo saaraan alkoolkan. Waxaa kaloo uu sheegay Gambool in isku daygan uu yahay mid muujinaya in ay awoodaan iney soo saari karaan jeermis-dile looga kaaftoomi karo kuwa debadda.

“ Waxaan soo saarnay tijaabo si dadka aan ugu tusno, marka ilaa 15 xabo ayaan soo saarnay, caagagga aan soo sarnay midkiiba wuxuu qaadaa 100Ml” ayuu yiri Gambool.

Cabdiraxmaan Gambool wuxuu sheegay iney wax dhibaato ah kala kulmin soo saarista agabkaan, una mareen hannaanka hay`adda WHO ee caafimaadka markii laga hadlaayo arrimaha ku saabsan diyaarinta kiimikooyinka la rabo in loogu adeego bulshada.

“Samaynteeda ma adka jaamacadaha gudaha ayaan looga baran inay soo saaraan mooyaane, waxaa dhici karta inaysan laabab u diyaarsan haysan, haddiise ay kuu diyaarsan yihiin kiimikadii iyo laabkii intaas oo kun xabbo ayaad waqti yar ku samayn kartaa, ” Ayuu yiri Gambool.

Ujeedka ay tiradan kooban u soo saareen ayuu ku sheegay inaysan awood u lahayn helidda kiimiko ku filan, wuxuuna sheegay in taasi caqabad ku tahay wax soo saarkan iyagoon dantoodu ahayn wax faa`iido ah. Wuxuu Gambool sheegay oo kale in haddii ay helaan kimikada ay u baahan yihiin inay soo saari karaan 24kii Saacba 1000 xabbo oo si bilaash ay dadka ugu qaybin doonaan.

“Si loo soo saaro tiro badan waa in la helaa kiimiko badan , qalabkii lagu soo saaryay waanoo yaallaa laakiin kiimakadii ayaa caqabad ka taagan tahay. ” Ayuu yiri Gambool

Wasiirka caafimaadka Puntland Jaamac Faarax Xasan ayaa Radio Ergo u sheegay in ay arrintan dhiirrigelinayso isku dayga wanaagsan ee wax soo saarka dalka waxaana uu sheegay in dawooyinka iyo agabka dalka soo saaro ka wanaagsan yahay ka dibadda ka yimaadda, wuxuuna intaa ku daray in ay qorshaynayaan sidii tallaabadan horey loogu sii dhigi lahaa.

Wasiirka wuxuu sheegay wax kasta oo la soo saarayo ay maraan hanaanka hubinta tayada, oo jeermis-dilahan loo maray qaacidda ay dejisay WHO, isagoo wasiirku sheegay inuu kamid noqday shakhsiyaadkii ugu horreeyay ee billaabay iney gacmahooda ku dhaqdaan jeerimis-dalahan.

Agaasimaha Wasaaradda Waxbarashada Puntland Maxamed Cali Faarax ayaa sheegay in qorshayaashii ay dejisay wasaaradda ee ahaa tayeynta waxbarashada dalka ay arrintan tusaale u tahay isagoo sheegay in ifafaalo wanaagsan uu ka soo baxayo oo ah in jaamacadaha dalka ay bilaabeen iney wax uriyaan oo tijaabooyin wax soo saar leh sameeyaan.

Post your comments

Jawaab ka bixi

Please enter your comment!
Please enter your name here