Burco: Qoysas barakacayaal ah oo la siiyey dhul ay degaan

0

Maamulka dawlada hoose ee magaalada Burco ee gobolka Togdheer ayaa ugu deeqay 450 qoys oo kamid ah dadka gudaha ku barakacay, kuwaas oo sedex sano ku noolaa meel u dhow garoonka diyaaradaha ee magaalada Burco.

Maamulka Degmadu waxay qoys kasta siiyeen hal boos oo cabirkiisu yahay 12 x 12 mitir kaasoo ay ka dhisanayaan dhismayaashii uga dhisnaa halkii ay hore u deganaayeen. dawlada Hoose ayaa sidoo kale qoysaskan u diyaarisay gaadiid si lacag la’aan ah qoysaska ugu raraya deegaanka cusub.

Cawil Cali Maxamed, oo ah horjoogaha barakacayaasha laga raray garoonka diyaaradaha ee deegaanka cusub lasiiyey, ayaa Raadiyo Ergo u sheegay inay aad ugu faraxsan yihiin deegaankan Kur-libaax oo hadda ay soo degeen.

“Waxay noola mid tahay farqiga u dhexeeya habeenka iyo maalinta horey waxaan joogto dhibaato ugu qabney mulkiilayaasha dhulkii aan deganayn oo noogu hanjebayey in dhulka nalaga saari doono laakin hadda anaga lafteena ayaa mulkiilayaal ah oo dhulkan iska leh.” ayuu yiri.

Cawil wuxuu kasoo barakacay deegaanka Xayira oo 75KM u jira magaalada Burco, magaalada ayuu soo galay kadib markii abaartii 2016 ay kaga dhamaadeen xoolihiisii oo dhan 120 neef oo ari ah. wixii xiligaas ka danbeeyey wuxuu ku noolaa magaalada Burco oo uu barakace ku ahaa. maamulka dawlada hoose ayuu ka rajo qabaa in lagu taageero sidii ay magaalada deegaan rasmi ah ugu noqon lahaayeen.

“Maamulka Degmadu waxay nagu wargeliyeen in dhamaan adeegyada aasaasiga ah ee aan u baahanahay nalasoo gaarsiin doono, sida Amaanka, waxbarashada, iyo caafimaadka.” ayuu yiri Cawil.

Canab Nuur Faarax, waa hooyada sagaal caruur ah, Inkastoo ay ku faraxsan tahay inay heshay dhulk ay iyadu leedahay oo kuyaala kaamka cusub ee Kurlibaax oo 6KM ka durugsan magaalada Burco, gaadiidka magaalada lagu tago oo ah Bajaaj (Tuk-Tuk) ayaa qiimo ahaan lagu raacaa hal dollar badhkii balse Canab ayaa Radio Ergo u sheegtay inaysan si joogto ah u awoodin lacagtaasi taasoo ku khasabtay inay u kala lugayso kaamka iyo magaalada marka ay suuqa muraad u yeelato.

“Masaafadu way dheertahay waana caqabad laakiin maadaama aan haysano dhul anaga aan leenahay oo mulki ah waan faraxsanahay.” ayay tiri.

Qoysaska barakacayaasha ah ee hadda ee degay kaamka Kur-libaax waxay taageero ka helaan hay’adaha samafalka ee Action Aid iyo World Vision. bil walba waxaa la siiyaa lacag kaash ah oo guno ah taasoo dhan $70 si ay ugu daboolaan baahiyaha aasaasiga ah halka maamulka degmadu bixiyo biyaha ay cabayaan qoysaskani.

Canab waxay taageero dheeraad ah ka heshaa ninkeeda oo ah Askari ka tirsan ciidamada milataryga Somaliland , oo bil kasta siiya 500,000 oo shilinka Somaliland ah una dhiganta $58 dollar. Canab waxay lacagahaasi ku maaraysaa nolosha sagaal caruur ah oo ay dhashay iyadoo soo iibsata neef ari ah oo ay gawracdo kadib hilibkiisa iibiiso waxayna neefka ariga ah ka faa’iidaa 30.000 oo Shilling.

Canab, oo ka soo jeeda degmadda Caynabo ee gobolka Sool oo 120 km u jirta magaalada Burco, ayaa ku barakacday abaartii 2016, taasoo qosykeedu ku waayey 300 oo ari iyo saddex geel ah.

Ku xigeenka duqa degmada Burco ee gobolka Togdheer Maxamud Cabdi Xoday, ayaa Raadiyo Ergo u sheegay in dadka barakacayaasha ah ay siiyeen dhul dadweyne oo degmadu lahayd si xal waara iyo deegaan rasmi ah ay ugu noqoto barakacayaasha gudaha.
“Maadaama hadda aan anagu siinay dhul ay lee yihiin waxaan rajeynayaa Hay’adaha gargaarka bini’aadanimada iyo ganacsatada masuulka ah inay caawiyaan una dhisaan adeegyada aasaasiga ah ee ay u baahan yihiin. waan sii wadi doonaa inaan siino biyo waxaan si tartii tariib ah ugu aasaasi doona adeegyada aasaasiga ah ee caafimaadka iyo waxbarashada.” ayuu yiri.

Marka laga soo tago qoysaska la dejiyay, waxaa jira barakacayaal kale oo wali ku baahsan magaalada kuwaasoo ay kamid yihiin ilaa 300 qoys oo degan agagaarka Jaamacadda Burco. Intooda badan waxay ka soo barakaceen deegaanada Oodweyne, Duruqsi iyo Xaaji Saalax ee gobolka togdheer. Intaa waxaa u dheer 250 qoys oo ka soo barakacay degaannada Baliweyn, oo ay ku jiraan Warcibraan, Dabaqabad iyo Shanshacadde oo iyana ku yaal gobolka Togdheer.

Dhammaantood waxay rajeynayaan in maamulka deegaanku ay siin doonaan degsiimooyin rasmi ah.

Post your comments

Jawaab ka bixi

Please enter your comment!
Please enter your name here