Beledweyne: Ayax uga daray dhibaatadii fatahaada webiga kasoo gaartey beeraleyda gobolka Hiiraan.

0

(ERGO) – Beeraleyda ku dhaqan gobolka Hiiraan ee bartamaha Soomaaliya oo dhowaan ay waxyeelo gaarsiiyeen faratahaadii uu sameeyey webiga Shabelle ayaa hadda waxaa dhibaato ku haya ayax cunaya wixii ay beerteen fatahaadii webiga kadib.  Kadiye Cabdi Gadood waa beeraleey ku nool deegaanka Xodug-wale oo 34KM u jira Beladweyne kana xigta dhinaca waqooyi, beertiisa oo ahayd 45  hector oo cabirka beeraha ah ay ku beeraayeen dalagyada cagaaran ayaa bishan 1-deedii waxaa ku degey Ayax guuraya oo baabi’iyey dhamaan dalagyadii ku beeraan beertiisa.

“Basal, qare, yaanyo iyo Salad ayaa ii beernaa, waa dhameeyey waa hadda kadib iyo tacab iyo qarash kale raadi, waa ka tegey beertii oo dhan, waxna kama sugayo, khudarta kharash badan iyo xoog badan ayaa iga galay.” ayuu yiri Kadliye.

Kadliye  waa aabaha 11 carruur ah, shaqo aanan aheeyn beertiisa malaha, waxaa uu tilmaamay in yaanyada ku beerneeyd beertiis ay joogtay xiliga suuqa loo qaadi lahaa iyadoo uu geliyey kharash dhan Kun iyo shan boqol oo dollar ( $1500 ) oo kala bar lacagtaas lagu leeyahay. fatahaadii webiga Shabelle ayaa horaantii bishii October ee sanadkii hore ka burburisey dalagyadii u abuurnaa waxaana uu markale dib u tabcay beerta bishii November oo fatahaadii webigu joogsatey, xiligan oo uu filayey inuu goosto dalagyadii uu sida degdega ah ku beertay fatahaadii kadib wuxuu qoyskiisa ku biilaa raashin dayn ah oo uu magaalada kasoo qaatay.

Sida laga soo xigtay Ururka Hay’ada Cuntada iyo Beeraha ee Qaramada Midoobay oo magaceeda loosoo gaabiyo FAO, Ayaxu wuxuu hore u burburiyey tobanaan kun hektar oo dhul beereed ah oo ku yaal Geeska Afrika. Waxaa loo arkaa inay tahay duullaankii ugu xumaa ee ayaxu qarniga soo qaado.

Gobolka Hiiraan horay loogama aqoon Ayax, beeraleydana wuxuu ku noqday lama filaan, Wasiir ku xigeenka wasaarada Beeraha Maamulka Hirshabeelle Maxamed Bashiir Daqarre ayaa Radio Ergo u sheegay in wasaaradda beeraha aysan awoodin wax ka qabashada dhibaatada uu ku haayo Ayaxu dadka beeraleyda ah, isagoo wax laga xumaado ku tilmaamay in beeraleeyda ku nool deegaanada maamulka Hirshabeelle ay sanad gudihiiqasaareen laba jeer oo mar fatahaadi saamaysay marna Ayaxu ku degey.

Dadka Beeraleyda ah ayaa isu abaabulay koox koox, si ay ugu kicinayaan beertii uu ku dago Ayaxu iyagoo adeegsanaya farsamooyin ay hindiseen oo isugu jira in Qiic lagu lagu shido meesha uu degan yahay, shanqar badan la abuuro si uu u duulo waxaana mararka qaar dadku isticmaalaan rasaas nool-nool si ayaxa loo kiciyo taasoo marararka qaar ku guulaystaan in beeraha qaar laga kiciyo.

Cismaan Maxamuud Cabdi oo ah aabo leh 2 caruur  kana mid ah beeraleyda deegaanka Bacaad oo 21KM dhanka waqooyi ka xiga magaalada Beledweyne ayaa sheegay in hadda ay bilaabeen qorshe ay iskaga kicinayaan ayaxa marka uu beeraha ku dego.

”Daasado dhagaxaan lagu shubaa ayaa la ruxaa shanqar bay samaynayaan marka la luxo, qeeylo sawaxan iyo Rasaas nool nool iyo wax loo kala reebtay malaha waa iska kicinay hadda ilaa shalay maan arkin 5 iyo 4KM inoo jiro shalay xitaa waa marayey hadda iyo kadib qorsheeyn ayaan wadaa, horay ayaan dhib ku abuuray dalagaan uu cunay” ayuu yiri Cismaan.

Jawaab ka bixi

Please enter your comment!
Please enter your name here