Haweenka ka ganacsada xoolaha oo ku soo badanaya magaalada Cadaado

0
Kaydka sawirrada/Ergo

(ERGO) – Labadii sano ee la soo dhaafay ayaa waxaa suuqa xoolaha ee magaalada Cadaado ku soo badanaayay haweenka xoolaha ka ganacsada kuwaa oo noolal maalmeedooda ka soo saaro. Siraad Ibraahim Cabdulle waxaa ka mid tahay haweenka ariga ka soo ibsada reer miyiga kana sii iibiyo dadka magaalada.

“Waxaan nahay afartameeyo dumar ah, waxaa nagu dhaliyay in aan nolosheena wax ka badalno, faa’iidada naga soo gasha, maalinna waan qadnaa maalinna waan quudsanaa, maalin 6 doolar maalina 5 doolar, adigu wax go’an ma ahan,” ayay tiri Siraad.

Sidoo kale Siraad ayaa waxay sheegtay in xoolaha neefkii u gadmi waaya ay u gaysato reera ay qaraabo yihiin oo ku nool deegaannada miyiga ah.

“Marmar ka qaar ayaa waxaa la ii keenaa ridu, ayadoo waxar wadata mar, toban ayay meesheeda ku noqotaa,” ayey tiri Siraad.

Nasteexo Cadaawe oo ah hooyo haysata toddobo carruur ah, ayaduna  waxay ka mid tahay hooyooyinka ariga ku iibiya suuqa. Nesteexo waxay Raadiyow Ergo u sheegtay in ariga neefkii gadmiwaaya ay ku xarayso xero kiro ah oo looga kireeyo hal falis.

“Waxaa nagu dhaliyay shaqada carruurtaan u xamaalanaa, nolosheenana waan ku dabarnaa carruurtana waxaan baranaa,” ayay tiri Nesteexo.

Nasteexo maalintii waxay iibisaa 5 ilaa 6 ari ah kuwaa oo ay ka macaashto lacag u dhexayso 5 ilaa lix midkiiba. Afar ka mid ah carruurteeda ayaa waxay dhigtaan dugsi quraan, kuwaa oo bishii ay ka bixiso lacag 28 doolar ah. Nasteexo ayaa waxay suuqa ku soo biirtay sanadkii 2017, ayadoo markaas la soo gashay lacag dhan 1,000 doolar.

 

 

 

Post your comments

Jawaab ka bixi

Please enter your comment!
Please enter your name here