Garowe: Ardayda tuulada Dundumaale oo aan haysan tasiilaadkii waxbarasho

0
Qaar ka mid ah ardayda Dundumaale/Maxamed Saalax/Ergo

(ERGO) – Boqol iyo siddeed arday oo dhigata iskuul cusub oo laga hirgeliyay tuulada Dundumaale ayaa waxaa ay dhibaato ka haysataa helitaanka kuraas iyo miisas ay wax ku  bartan. Ardayda ayaa derin ku fadhiista xilliyada ay qaadanayaan duruusta.

Cabdikaafi Maxamed Aadan oo 14 jir ah, waxaa uu ka mid yahay ardayda wax ka barata iskuulkan oo la furay bishii Ogoosto ee sannadkan. Waxaa uu subax walbo xaafadda ka soo qaataa derin uu ku fadhiisto xilliga uu fasalka joogo. Cabdikaafi waxaa ay caqabad ka haystaa in uu si wacan arko sabuuradda maaddaama ay meel sare suran tahay.

“Sidaan sabuuradda ugu jeedno. xataa surka ayaa najaba, anigana uma dulqaadan karo, xanuunno jidhka ah ayaan dareemaa saan kor ugu jeedo,” ayuu yiri Cabdikaafi. Qoyska Cabdikaafi oo ahaa xoolo-dhaqato waxaa ay tuuladan soo degeen sanadkii 2016 kaddib markii ay abaar ka laysay xoolihii. Waxaa ay hadda tuulada ku haystaan 30 ari ah.

Maamulaha Dugsiga Dundumaale Falastiin Cabdulqaadir Cawad ayaa sheegtay in macallimiintu ay dhib ku qabaan kuraas iyo miisas la’aanta oo aysan fahansiin karin ardeyda casharka.

“Waaad dareemaysaa ilma yar oo dhulka fadhiya, ma aha qof weyn, ilmaha yar marka uu dhulka fadhiyo surka ayaa daalaya, adigana waxaad rabtaa in aad wax fahansiiso iyana way daalayaan,” ayay tiri Falastiin. Toddobo doolar ayaa laga qaadaa ardaygiiba, waxayna Falastiin tilmaantay in aysan ka badnayn musharka macallimiinta. Waxa ay sheegtay in 30 ka mid ah ardayda oo danyar ah aan wax lacag ah laga qaadin sidaas darteedna macallinkastaa qaato mushar gaadhaya $250 doollar.

Xaawo Maciisha Aw-Maxamed waxaa iskuulka u dhigto labo cunug.

“Anigu labo xasiig ayaan lahaa mid baan siiyay, martidii wax aan siiyo ma leh, carruurtii kale wax aan siiyyo ma leh,” ayay tiri Xaawo.

Xaawo waxay rajo xumo ka muujinaysaa in aqoonta ilmaha la barayaa ay fahmi waayaan maaddaama aysan haysan qeyb ka mid ah tasiilaadkii waxbarasho.

“Waxaa dhici karta in ilmihii waxba arki waayo oo wixii la soo dhigay iyagoo aan waxba ka garaneyn igu soo noqdo ayaa dhacda,” ayay tiri Xaawo oo 30 oo ku dhaqata tuulada.

Iskuulkan agab la’aanta ah waxaa dhistay dowladda hoose ee Garoowe kaddib codsi ay dirsadeen dadka deegaanku, sida uu sheegaayo guddomiyaha Dundumaale Cabdiraxmaan Siciid.

“Kuraas ku ma jirin mashruuca, waxaanan u aragnaa in aan waxba nala ka hagranayn madaxda waxbarashada ee wasaaradda iyo maamulkaba, markaa waxaan ku niyad qabnaa in ay noo imanayaan oo noo keenayaan kuraas,” ayuu yiri Cabdiraxmaan.

Post your comments

Jawaab ka bixi

Please enter your comment!
Please enter your name here