Qoysas dib ugu soo laabanaya guryahooda oo ku yaalla Beledweyne

0
Guri uu garbigiisa dumisayay daad/Cabdi Axmed Xuseen/Ergo

(ERGO) – Kaddib muddo bil ah oo ay ka maqnayd gurigeeda, Amaal Maxamed oo ah hooyo dhashay 8 carruur ah, waxay gurigeeda oo ku yaalla Laanta-Kutiinbo ee magaalada Beledweyne ku soo noqotay 25kii Nofembar. Waxay Raadiyow Ergo u sheegaty in kuleeylka ka jira deegaanka Ceel-Jaale ee ay u barakacday uu ku qasbay in ay dib ugu soo laabato gurigeeda.

“Dhaxantaasi iyo qabawgaas waa is kaga soo xarooday, maaddaama aanan wax banaanka ku haysan. Ciyaalkii ayaa iga rafaaday marka sidaas ayaa guriga igu soo cilisay. Duurka ayaa musqol loo aadaa, biyahane jirgaan ayaan qaadanaa ciilka Qoofyow ayaa naloogu doona” ayay tiri Amaal oo intaa ku dartay in ilaa hadda aysan helin wax taakulayn ah.

Waxaa sidoo kale ka mid ah dadka dib ugu soo laabtay guryahooda oo ay weli biyo dhexjiifaan Siyaad Cali Gaarane oo ah aabbo leh 8 carruur. Siyaad oo ahaa muruq-maal ayaa sheegay in ay magaaladu weli kala xiran tahay oo aanan jirin meel loo shaqo tago, isagoo walaac ka muujiyay xaallada ay qoyskiisu ku nool yihiin.

“Biyahii guriga markii ay ka baxeen, guriga oo dhiiqo leh ayaan iska soo dagay, dhiiqadan sidan u soo galay wax gargaar ah oo nasoo gaaray ma laha, dadka waa soo dageen, waxaa nagu haysato dhibbaato dhinaca musqosha ah, meel lagu banan baxaa ma jirto, biyo la’aan ayaa sidoo kale jirto, gurigii qayb ka mid ah biyaha ayaa dumiyay,” ayuu yiri Siyaad oo intaas ku daray in uusan awood u lahayn dayactirka gurigiisa. Xaafadaha lagu soo laabtay ayaa waxaa ka mid ah Buunda-weyn Xaawo-taako iyo Kooshin.

Caa’isha Cabdullaahi Muumin, oo aragga naafo ka ah waxaa ay ku nooshahay xiro barakac ku taalla xaafada Kooshin. Toddobo cisho ka hor ayay gurigeeda ku soo laabatay. Saygeeda oo ah garab-rarato ayaa qoyska uga soo shaqeeya magaalada, ayaduna caruurta ayay haysta maalinti balse waxaa Caa’isha ay dhibbaato ka haysataa dhanka cunno karinta maaddaama ay arragga la’dahay.

‘’Abbaha wuu baxaa maalintii, haddii uu wax soo waayo, waan iska seexanaa, dhibaato weyn ayaa ihaysato dabka xitaa aniga ma shidan kari, aniga xitaa ma soo shaqeeynsan kari, xitaa aabaha ayaa habeen iyo malin dabka inoo galo dhiiqadaas ayaan iska dhex jooga,” ayay tiri Caa’isha

91 muqlood ayay dhiseen maamulka Gobolka Hiiraan oo kaashanayo hay’adaha Cesvo iyo Qatar Foundation sida uu sheegaayo Shiikh xuseen cismaan Cali Guddoomiye ku xigeenka arimaha Bulshada ee Gobolka Hiiraan

Post your comments

Jawaab ka bixi

Please enter your comment!
Please enter your name here