Wasaaradda waxbarashada Somaliland oo dib u howlgelisay 80 dugsi

0

(ERGO) – Labo ka mid ah carruurta Maxamed Faarax Aadan ayaa hadda waxaa u iftiimaya mustaqbal wanaaagsan kaddib markii tuulada Mandheera laga hirgeliyay iskuul cusub oo ah hoose iyo dhexe. Maxamed wuxuu Raadiyow Ergo u sheegay in uu ku faraxsan yahay in carruurtiisa ay waxbarasho bilaash ka helaan tuulada. Carruurta oo ay da’doodu tahay kow iyo toban sano jir iyo toban sano jir ayaa waxaa hadda laga diiwaan geliyay iskuulka oo ku yaalla tuulada. Maxamed waxaa marki hore iskuul ku yaalla tuulada Abdaal u dhigan jiray carruur kale.

“Kuwa kale  malcaamad ayuun bay dhiganayeen oo geed hoosteed ah, kuwan waxaan qoray fasalka koowaad, waxbay iska baran doonaan markii haddii xaafadda agteedii dhismaha dugsiga looga sameeyay,” ayuu yiri Maxamed.

Waalidiinta ku nool goobaha dugsiyada laga furay ayaa aaminsan in waxbarashada caruurtoodku kor u kacayso haddii markasta laga caawiyo dhismayaasha, dayactirka dugsiyada, iyo bixinta mushaharka macalimiinta, sida uu Raadiyo Ergo u sheegay Xasan Ducaale oo ku nool tuullada Sabawanaag.

“Carruurtii dugsiga ayay dhiganayaan, anna xoolihii ayaan eegayaa, markii wax dugsi ah ma jirin oo kolba meeshaan xoolaha u raro ayaan u kaxayn jiray laakiin hadda tuulada ayaan kaga tagaa si ay waxbarashada u dhigtaan,” ayuu yiri Xasan.

Wasaaradda waxbarashada Somaliland ayaa furtay tobankii bishan sideetan dusgi oo ku yaalla dhamaan gobolada Somaliland, kuwaa oo toban ka mid ah ay cusub yihiin halka toddobaatanka ay yihiin dugsiyo ay wasaaraddu ku kordhisay fasalo cusub. Dugsiyada cusub ayaa laga hirgeliyay Mandheera, Abdaal, Sabawanaag, Hadeyta iyo Huluul. Axmed Abokor, agaasimaha guud ee wasaaradda waxbarashada Somaliland ayaa Raadiyow Ergo u sheegay in wasaaradda ay dayactirtay fasallo ku burburay dabeylaha roobabkii Deyrta ee sanadkan ka da’ay Somaliland.

“Mashruucan dhismayaal badan ayaa laga dhisay, dugsiyo hoose dhexe ayaa laga dhisay, waxaa laga dhisay deegaanada Somaliland oo dhan, carruurtu waa inay ka faa’ideystaan goobaha waxbarashada ee deegaanadooda looga sameeyay,” ayuu yiri Axmed

Sida uu Raadiyow Ergo u xaqiijiyay, Axmed, mashruuca dugsiyadan lagu dhisay oo ay ku baxday $900,00 waxaa lacagta ka caawiyay midowga Yurub.

Guddoomiya waxbarashada gobolka Saaxil, Ibraahim Xasan Digaale ayaa Raadiyow Ergo u sheegay in bulshada degmada Mandheera ee loo sameeyay dugsigan ay baahi weyn u qabeen waxbarashada. Ibraahim sheegay in gobolku laga hirgeliyay seddex dugsi oo cusub oo deegaanada xeebta u dhow ah maaddaama ay kululyihiin oo caruurtu aanay socon Karin duhurkii marka la fasaxo dugsiga.

“Hadda waxaan rajeynayaa in ardaydii dugsigii loo bedelo oo ay halkaas macalimiin aan ugu diyaarinay iyo maamulkii waxbarasho ugu bilaabaan, runtii carruur badan ayaa dugsiga looga kaxeeyay fogaanshaha markaa dhibtaas inay xalinayso ayaan filaynaa sidoo kalena ay carruurta waalidiintu keenaan,” ayuu yiri Ibraahim.

Post your comments

Jawaab ka bixi

Please enter your comment!
Please enter your name here